21 January 2015

石蘺坪麗徑坪富徑

貳零壹叁年拾拾壹日 - 石蘺坪麗徑坪富徑

因附近開左一間酒店式住宅同埋知道黎緊會有幾間酒店開張(主力係商廈工廈改建),所以知道一定會番天覆地既改變,無得食平野了,

襯住一直住開既舊區仲未有太明顯變化,就搵左個禮拜六影下相(依度因住既人唔太多而且老人家為主,所以好多鋪頭平時係做依度附近商廈番工既人既生意,星期日就好多會關晒門,咩都無得食)

其實一直想影既係位於坪麗徑坪富徑既三座舊樓,名德,名堂,名賢大樓,依度住左好多印巴或南亞人,係一個佢地既小社區,但唔覺治安有咩問題,當然舊樓就會覺得佢又殘又舊咁,但都見佢已經開始番新,唔知最後會變左咩樣子

先去坪麗徑,依度有報紙檔,茶餐廳,小茶樓,印式食店,鐵打鋪,五金鋪,冷氣維修,廢紙回收,文具鋪等等,都算幾多元化,d日子就好多印巴小朋友集中係依度,可能係樓上有間叫最後的使者運動既地方,上網check過係清真寺同做禮拜既地方,我估類似我地既社區會堂咁,而附近亦有社區中心會定期去做一d關心少數族裔既野,今次就見有扭氣球比小朋友,佢地有種我地細個時周街玩周圍走又易滿足既笑容同習性,香港加下既小朋友就無晒依種野了

Anyway,影晒坪麗徑就轉左去隔離既坪富徑,依度就係比較冷落小小既小街,本身都有少少食市同埋士多辨館同粥鋪,不過就好多已經執左,得番1-2間茶餐快餐,仲有間麵包鋪同埋機鋪,依度最特別係有間比較出名既穆斯林餐廳同埋一間好舊既唱片鋪,,居然有間唱片鋪(惠林唱片),仲要係有部份賣錄音帶既舊歌cassette,真係細個時先有東西同格局

之後呢行左去大馬路,依度係青山公路葵涌段,就比較熱鬧既地方,基本上都無咩吉鋪,有食市,舊商場,紙扎鋪,燒臘鋪,生果檔,雜貨鋪,麵包鋪等等,依度最特別除左好多鋪頭貓同有隻傻狗(好大隻既唐狗,好為食但個樣又蠢蠢地,仲要成日訓係路中心最中意係最窄既地方企或訓係度,阻住晒一眾街坊行路,不過佢個樣夠傻同埋好乖,所以都幾得人中意)之外就係有檔補鞋檔,個名叫梁伯補鞋,不過我地一直叫佢做橋底阿伯,聽阿媽講佢係度已經幾十年,雖然同伯伯講野好困難,佢太老有撞聾同口齒不清,基本上重複3次佢先聽到你講咩但佢答你時又到你聽唔太明佢講咩,不過隱約聽到佢話八十幾歲,見佢工作環境好細,而且光度唔太夠,不過其實佢仲做緊生意,仲有人幫襯緊,而且手工非常仔細又好鬼平,好似2-5蚊補一隻鞋,咁大年紀仲可以睇到都算好野了

最後行埋去大隴街同打磚坪街,其實依兩度無咩特別,不過叫順手記錄下加下仲有既細鋪小檔口等等,而且因多印巴人住,有時d社區大廈通告檔口等等,會寫有佢地d蛇仔文,都幾特別下,唔知幾年後,依度既酒店開晒,又有咩番天大變化呢,希望唔好啦,依度食野都係算平,起碼我仲搵到20蚊樓下既早餐40蚊樓下既午晚餐,

[21/12/13]
Photo Link <<<<<<<<<

20 January 2015

新解禁邊境生態遊 (Part.02)

貳零壹叁年拾月捌日 - 新解禁邊境生態遊

Part.02 - 松園,羅湖懲教所,梧桐河,得月樓警署,得月樓村,料壆村,信義新村,馬草壟村,河套區,落馬洲村,下灣漁民新村,落馬洲警署,落馬洲瞭望台
食好晒野再出發,經過非常鄉郊感覺既松園,再行到羅湖懲教所,一直經河上鄉道行再進入梧桐河,真係一條非常長既路,踏單車就非常好風景了

無幾耐就見到沙嶺過少少就已經係羅湖火車站,見到平時行既鐵橋,又穿過東江水既大喉管,禁區牌,行行下就見到好近既羅湖同之前防偷渡既鐵絲網,聽講只係拆剩依度,前少少就已經係得月樓警崗同深圳河,聽講依個警崗之前無人注守,係開左新禁區後先有人,見到一圈圈既鐵絲網同高閘,依度就係新邊界,中間有條橋,有村民行過,但要show permit先入得黎,應該係住附近既得月樓村

睇完就繼續行,上左緊餘一排鐵絲網既車路,睇下之前既禁區界線,再行就係得月樓村同料壆村,前者係一般既村屋無咩特別而後者比較古舊,而且村後既一大片綠草地同深圳既現代化好大對比,除左睇景,亦介紹左一種黃色既植物,叫菟絲子,用黎對付破壞力強既薇甘菊,唔知最後會唔會成功呢?

睇完就開始上山行去信義新村同馬草壟村了,依個山好多山墳,雖然唔算太高但環境都唔錯,再行就見信義新村同馬草壟村,仲咁岩見到馬草壟村既村巴,禁區開放後好似想小巴可以入到黎(有貼公告),唔知依d村巴仲可以keep到幾耐呢?係馬草壟村仲見到掛左中國國旗唔係特區旗,可想言之佢係幾近內地呢,仲有見到其中一家種左一d,之前未見過,好似聖誕波波咁,好趣怪

去到河套區,好大好大既一幅地,而且好似料壆村後既草地一樣,深圳係高樓大樓而面前既地一片鄉郊感覺,而且好似梧桐河一樣,好適合踏單車,我地呢就行路,都真係幾倦下

再行一大段路就到落馬洲村,入面有間古舊既書室,叫美德家塾,可能平時無咩人而且無咩維修,保持舊貌,但就有好多惡狗,所以行果時要好小心,前少少就見下灣漁民新村,一個細細既村落,因位置較低,所以可以清楚見到一排排整齊既屋頂,再上少少山就到落馬洲瞭望台,岩岩日落,見到少少農田仲有水既反射,感覺不錯,再上頂就係落馬洲警署,幾靚咁,伙門口影左一兩張相走人了

最後行番皇巴站,完成了一整日既邊境游,足足行左7個鐘,勁呀,睇番個地圖,行左好遠路,不過值得既,希望未發展前有機會再黎依度踏下單車啦


[08/12/13]
Photo Link <<<<<<<<<<<