27 December 2014

鯉魚門創意館-戲棚搭建(盂蘭-藍田配水庫&石梨街)

貳零壹年捌日 - 鯉魚門創意館-戲棚搭建(盂蘭-藍田配水庫&石梨街)

參加左鯉魚門創意館既戲棚搭建,去左藍田配水庫,上一年都去過睇盂蘭,今次就睇事前功夫,搭棚其實算係香港特色,用竹同膠帶可以一路起到幾十層樓高,而且仲搭得好快(細個時半日已經見搭棚師父由樓下起到十幾廿層,而且拆棚亦好快,由高處垂直掉落地,地面有另一工人徙手接住,好快好準)

講番盂蘭棚,當日講解既係陳煜光師父,亦係其中一個專做盂蘭棚既老闆,去到現場岩岩見好多竹運緊黎,個棚岩岩開始,見到已經有燒衣同點香,問過無咩特別時間同埋方位,只係開工前要做既拜四角儀式,但求順利,聽陳師父講,加上已經無咩禁忌但之前就嚴緊好多,例如見到和尚同大肚婆果個搭棚師父當日都唔可以開工,而打醮呢就真係好執正好多,要擇時辰同拜既方向都要跟足喃嘸師傅既指示做,但市區一般既盂蘭只係拜下四角就可以了

盂蘭棚首先要搭戲棚,而我地睇緊既就係岩岩搭緊既,只要由幾支實木支撐再加竹一路加上去,而因盂蘭棚唔會太高,加上怕冷縮熱脹或雨水滲入整到個棚變斜,所以要用舊竹(咁都幾環保,可以用起樓唔用既舊竹),大約12hk一支,可以番用到2,而底既木板呢就可以番用1,材料呢就仲有鋅鐵皮,見到運黎時係一圈圈既,但已經有生銹既痕跡,問陳師父佢話之前用日本既可以番用3-4,但前年已經無再出,加上用國產既就因較厚身所以易爛而且一濕水就會生銹,只可用一次,問鐵皮幾時上,師父話交場前5日先上,而平時儲存既地方,就相對黎講要過萬尺好好收藏

至於搭棚時間,只會做日頭而且到6點前,夜晚唔會做,而且好似眼見無lala落大雨都會停工,因同一個月好多盂蘭場係香港舉行,所以如果衡量過唔夠時間寧願唔接都唔會夾硬做,基本上要5日至一個禮拜到先做完成個場(當然都要睇天氣),而官塘果個就要9,係最多時間既一個場,而陳師父亦提到石籬係最難做既,因地方太細,要做足咁多個棚而且係依山坡起,所以係最難既棚(上年睇過咁細地方都可以起足咁多個棚而且戲棚都有,已覺好利害)

問到場地保護,跟據上年經驗,好多球場既地要保護得好好,而且要同政府租地,想知前事要咩手續,原來要經屋宇處同康文處,不過手續已變簡單左,只要合格師父簽棚紙就ok,而場地保護就要木板加石屎,d仲會用成個場都鋪木板以免整花整爛個地,陳師父話最困難既係場地太細同埋保護地下,會比較頭痛,而保險方面,只會係第三者同意外保險,至於場地保險會主盂蘭大會負責番

基本上係場地考察期間既兩個鐘入面,其中一個棚既外圍已見芻形,如果天氣好既話應該會比較快,至於工作人員,大部份係男士,但陳師父話佢都有個女徒弟,但因體力問題,所以都係男多於女入行,日曬雨淋都其實幾辛苦,不過陳師父主力做盂蘭棚,所以基本上在場既都係另有職業,至於入行後既學習,首先都係要係地面幫手,之後練好竹上既馬步先可以上棚,唔係就會好危險,一個頗特別既行業

至於盂蘭棚,陳師父話7-8成都係竹棚,而鐵架既佢地就會叫天幕,因固地size同埋形狀,所以唔係個個場都可以做到,亦要一次過簽四年約先會做,靈活性較少,個人而言我都係中意竹棚,個感覺好好多,

之後順手番左石籮睇個場,又見到陳師父,睇真d果真係山坡而起,而且已經去到最後階段,鐵皮已上,影左相之後仲順手問埋場地理事巡遊時間,唔知到時可唔可以睇到呢

[08/03/13]
Photo Link <<<<<<<<<<<<<

26 December 2014

浪茄camp 2013

貳零壹参年柒月拾日 - 浪茄camp 2013

連去兩個禮拜camp,今次去浪茄,晨早未夠9點入到去已經有人係度camp,但好位仲有,但今次天色唔算太好,不過叫做無咩落雨,而且可能因暑假關係,星期六都好多遊艇,多遊艇自然人多,同上年去既好唔同,果次係得我兩個人要晒成個沙灘,今次寧靜不再,而且因無咩太陽又多船,d水雖然仲係好清但d色唔夠靚,亦唔多見到水底,可惜

夜晚好大風,所以無咩蚊,我地打邊爐,而旁邊好多人好多camp,所以相對黎講比較嘈,食完野行左陣沙灘,今次除左香港人,仲有大陸人同外國人camp,而外國人呢,就係沙灘扎營,見佢起左個campfire,d風吹番轉頭,camp食哂煙,攪笑

行完沙灘就訓,不過因人多所以比較嘈,我地已經成十二點先訓,但有個營兩男兩女就岩岩先開始食野,仲一路嘈,煩死,不過唔知點解無人鬧佢地,而我呢就爭d忍唔住,不過最後都無出聲而戴左耳筒就訓了,,今次舊叉電終於無問題,用左成晚燈仲可以用到風扇,因我訓左朋友個營,依個營可能耐無用,痴立立而且非常細仲要好焗下(外面其實非常大風,fly吹到我以為佢頂唔順),d都唔通風,如果無風扇可能要開晒個cover先訓到lu
第二日訓到八點幾九點,去完廁所行左陣沙灘,今日比琴日更無陽光,食完早餐後出去遊左陣水,無太陽真凍,之後沖完身食埋個lunch就慢慢執野走人了,中午都幾曬,可能因之前落左一陣小雨,所以更焗,不過還可啦,上次一舊雲都無今次算係咁了

[13to14/07/13]
Photo Link <<<<<<<<<<<<<

25 December 2014

涌背camp 2013

貳零壹参年柒月陸至柒日 - 涌背camp 2013

去左八仙嶺附近既涌背營地camp,睇網上資料環境好似唔錯,而且十分近車路,所以係一個非常輕鬆既campsite,一早係大埔食完早餐買好野就查車入去,泊好位搵好地點就開始扎營,但唔知係咪因今次無做薯片儀式,所以起好營無耐就落雨,而且係好大果隻,因我隻營比較舊,所以落左陣雨入營睇睇,係窗口個位入晒水呀,原因係膠邊老化,雖然已經用膠袋擋住,但唔知頂得幾耐,所以最後入左fly去避避

之後呢停左雨,就開始食下燒賣同周圍行下咁,上游近河部份非常多蚊,可能平時無咩人行,d蚊係咁撞埋我度,真係好肚餓咁款,行左一圈落左去廁所附近,見有最水喉星盆咁不錯既設施,上番營地,有蝸牛,蜈蚣而且石牆度仲有好多蟋蟀,好似住係一間間房咁,好熱鬧,而且仲有個不錯既magic hour,可能落完雨清洗下d塵所以有個靚日落掛

夜晚係食燒烤,因有三個大食男,所以野食都算食得晒,食完野睇星,可能依度無咩光害,個天都算有好多星,但因始終有少少煙霞,所以眼見但我部雞相機唔係點影到

食過糖水後訓覺,個天又落起雨,而且因我個位係fly個角底之前又唔記得挖去水坑,所以個營係咁比雨霖,基本上係訓唔得安落成日要整個營(卒之深切體會到木屋區落大雨既人既苦況了),之後更發覺開始積水,所以要起身郁營,搬呀搬,搬到無位時已經發覺唔多掂,睇睇錶已經五點幾,算了,收營落去廁所位睇下書等天光,去到廁所位見有個唔錯既石椅,睇落幾好訓,所以就夜晒d濕野係地,換件衫著番條長褲點好兩個蚊香訓覺lu,雖然出面馬路好多人鏈車,d聲打番入牆好似立體聲既效果,不過都唔理了,先訓為敬,朋友去廁所見我咁話係露宿者,我認不過好過訓一個入水既營,而且因石椅係雲石底,訓落一d都唔熱,後尾仲有少少凍要羅番張席出黎放底先好d,後尾清潔工人到左洗地,幾驚佢會洗埋我放野既地下,點知無,,我再一次體會露宿者既心情,

後尾天光上番去食早餐,見有太陽當然羅番d野出黎起勢曬,食完早餐,又食西瓜,大熱天食西瓜真係爽,而且見朋友個營前面有條蟻路,大中細蟻非常忙碌,睇左陣小生命既生活就開始執野走人,又係大太陽又落下雨咁,去到近來非常火既龍尾,見到掛起晒個牌寫住熱烈慶賀龍尾動工,係依度住有地既村民做生意既人睇黎相當高興,其實依度都幾多人,唔知係去沙灘定係踏單車,旁邊既食野地方都非常full,我地搵左間睇落低檔少少既餐廳仔食tea,飲左幾支啤酒,睇下又晴又雨咁,依個天氣踏單車真慘,最後番家後我都中招,發燒了,一定係之前一晚比雨霖濕再露宿廁所門口之後又大太陽咁病啦,不過涌背營地真係一個好地方

[06to07/07/13]
Photo Link <<<<<<<<<<<<<<<