貳零壹参年肆月陸日- 奇華閣咖啡餅店 & 另類經濟文化-閒談當押業
上晝睇完鯉魚門村,下晝就趕去旺角聽另一場講座,夠鐘前先食個lunch,去左奇華閣咖啡餅店,之前去過不過係夜晚所以樓上無開,今次呢就當然坐樓上,仲要係最近樓梯個位,可以直接望番落樓下,野食呢,tea都有幾種,算有特色,味道還可,佢張椅雖然唔夠上次係紅磡果間舊到甩甩地皮,但係用比較舊式感覺既紅皮疏化,還不錯,而地下磚仔都係舊的,而佢果支水晶燈,係細個時酒樓成日用果種,好耐無見,呵
今次聽既講座呢,係香港史學會辨既,講者係鄧家宙,睇佢個樣咁後生但知既野都真係唔少,anyway,今次係講比較另類既古老行業,當鋪,以傳統一d既思想,當鋪依類東西唔係一般人家去的,但當然有時聽導賞又或者阿媽都有講過,果時窮人都成日幫襯當鋪,主要係夏天時當被,貪佢有地方放又有錢係手,而佢個招牌,係以蝙蝠外型所設計(蝠鼠吊金錢),應該係同賭場招財既差不多意思,所以雖然對依行認識唔多但都叫做知少少啦
咁呢正式講時就知道原來當鋪係唔止當咁簡單,仲有分典(以物抵押借貸),當(貸方付款行為),質(抵押品存於貸方時間),按(以物抵押借貸但物品仍由倡方擁有),押(抵押品)五種,而當鋪來源係印度佛教,而且外國當押業務都係來自教會,可能係因要救人急難幫下人咁,所以同教會宗教好有關係,而中國呢就係南北朝已經有,初稱為寺庫,解庫,長生庫,睇個名都知大約意思,而之後當鋪有官辨同民辨兩種,同加下既銀行concept差不多掛
而五個種類既性質,又有分各自唔同既抵押品同年期月息唔同,多數以二分為最低消費(即20%)可能因涉及錢銀既生意,所以做出黎比較有制度所以規限又自然多而比較清晰,都其實幾多學問係入面
當鋪呢一直以來係以舊歷計算,原因係舊歷每個月既日子比較短,所以月息黎講當鋪當然用短既黎計,到今時今日都係以舊歷寫借單,幾有特色
而講到香港既當鋪發展,來源無講但最舊既當鋪係晉源押,有二年年歷史,地點係元朗舊墟(1910年),我之前都去過,個木制牌真係非常舊,但好似無人理咁放係門口,由佢風吹日曬,加下唔知仲係唔係度,真可惜
之後講來1858年既富輝案,自問所知甚少,基本上係未聽過依件事,但當時對當鋪黎講係非常大既一件事,事源係因有人偷左一個外國人既手錶,跟手羅去富輝押當,警方就控告當鋪主人接贓,要充軍14年,係十分重既刑罪,所以當鋪就發起簽名運動後尾改判兩年徒刑,因為依件事同毒面包案(華洋衝突),所以發覺有依個特別行業,所以開始立例同埋要登記,仲要每年續牌,價錢500,當年黎講係非常高,而且唔比兼營其他業務,即間接打壓,所以當時立例時即時罷市,最後係點,無提到,但當中既發牌,所要既規定加下都係根據差不多模式所限,(1947年修例用到今時今日,09年最後修訂),到二戰後當鋪因市民物資短缺生活艱難所以商人即時擴張當鋪業,多以短時間內收物品再變賣,仍好有市場
之後講起兩個當鋪大王,一個係李右泉,三十年代壟斷八成當鋪,灣仔出名既和昌大押都係佢既鋪頭,而另一個係高可寧,同李右泉聯辨當鋪,後來主力澳門市場,澳門當鋪博物館既德成按就係佢既物業,當中因李右泉以雙喜為吉利,所以佢既當鋪會有雙喜係招牌度,真係唔講唔知
之後呢講到依個行業既式微,因當時既人太窮,所以好多斷當,周轉困難而且政府又收貴稅,銀行興起,而且因衛生問題唔同比當被,舊衫等等,所以更加少可以按押,加上擬價好講經驗,但又要投資好多時間先得,所以少人入行,後繼無人,相信同其實古老行業一樣,好難再度發展,有得保留已經係萬幸
講到運作,香港以押,短期限(戰前6個月戰後4個月)同小額貸款為主,而且好多野都唔比押,例如古董,車,樓等等,反而外地就廣泛得多,而當鋪特色,除左門口既遮醜板,非常高既接收檯(票檯),仲有綱門綱窗等等都係比較明顯而劃一既布置,內部呢就有馬紙(一串掛起用黎配對抵押品入倉),貨倉,夾萬,電腦(主力用黎同警方溝通以及接賊贓),鄧博士仲比左幾張當票既圖片黎睇,基本上除左寫有舊歷日子仲有,月份以天地玄黃寫出黎,會每月轉,例如成,玉等等,其他寫有抵押品資料,價錢等等,但非常龍飛鳳舞,但求內行人只識睇
之後分享左一d術語(朝奉=二叔公,追貓=後山即票檯幫手,碼房=賭場有二叔公坐既房),招牌,客源(多接近黃賭,而且近來增加左年青人找卡數同外傭幫襯),同結束時點處理,仲有睇咩書/戲可以知多d等等,非常特別的知識,有趣
[06/04/13]
No comments:
Post a Comment