31 October 2013

香港史學會-長洲導賞團 - Part.01

貳零壹年拾月拾陸日-香港史學會-長洲導賞團

地圖講座之後又參加左香港史學會既長洲導賞團,晨早9點半就要係長洲集合,真係算好早,好在我去碼頭都唔算太遠,還可啦

去到講左少少野好快已經起行,史學會果邊有三個人,一個專影相既,另兩個講解,因人太多所以要我地跟緊少少行,其實我唔知係講咩主題,但就對導賞團總有一份期望,原來今次主要係講長洲既族群同埋廟教堂之類既東西,又幾岩我喎

一開始講社,即土地,長洲有分北社南社,我地先去南社,每個社算係一個族群,長洲主要有惠州,潮州同埋廣州,惠州就係惠陽,海陸豐,仲有鶴佬,而潮係潮汕,佢地多數住係北社同埋新興後街,而廣州呢即寶安東莞等等就多數住係南社,其餘仲有客家同埋蜑家就集散於長洲

第一步係去中興街,見到有個社係樹下,原來係因社多數係放路口又或者入區既樹下,用以講入社後就係當地人既地方,用黎分界又好拜祭又好,有一定既作用係度,而依個社壇係有個燒衣既洞係下面仲有排煙口,聽講依個設計香港唔算多,睇完再行其他地方

去左花地瑪聖母堂,睇相同真身有少少唔同,聽講重建過,算係長洲最早既教堂,依度有聖母巡遊,雖然澳門菲律賓都有,但其他係固定係5月13號但長洲呢因要避開太平清醮,所以多數係之後先做聖母巡遊,我以為只有天后先會巡遊,原來天主教都有依樣野既,d團友入左教堂睇,我呢就無咩興趣,但可能有教徒又可能係開頭既行程而且教堂既人係度講解花地瑪教堂d野,所以攪左好耐,我就四圍行下,無咩睇

之後出左黎去左隔離既浸信會堂,又係好耐歷史既野,好彩無開到門,唔係又唔知攪幾耐

左朱遠德堂,見到又有另一個社,依度所拜既係比較原始既石牌,三角型好似有頭有身咁,當時d人就係咁拜,無咩石像神像既東西,只係單一搵到舊三角形既神似一個人坐係度咁就會拜祭,真係比較簡單

再行前少少係朱氐宗祠,唔入得去但就講下門前既對聯,原來好多對聯都有佢地既意思,鳳陽世澤沛國家聲,鳳陽同沛國都係地方前者為鄉下即安徽後者為地方我唔記得左係邊,而世澤家聲同係朱氏中早期最出名既人,所以就寫左佢地落對聯度,佢對面有塊石牆,原來好多時有d祠堂會有依d石牆係度,叫石牆照壁,係風水野用黎擋d唔好既野,而點解好多時都叫咩堂,原因係堂要黎做permit既東西,當時流離失所,要入番自己既宗族就要到依d堂做手續同入住當地既社區,表示來
自同一宗族,所以好多時都係以咩堂為名

之後行過左一d同鄉又或者街坊會等等再進入左北社,係北社街口又見到另一個社壇,咁岩有人拜祭緊,又係三角型既石頭,再行前少少係太平山建醮聯會,聽講係太平山過黎既,因市區做唔到打醮後尾就黎左長洲做,再前其實聯會同埋北社會堂,依度係太平清醮既其中一個攪手,所以都幾多有關於太平清醮既野睇,再去左前少少既豫章草盧,見到少見既石額枋,聽講依家既多數係木做,石做既香港係比較少見

再前邊就係玉虛宮,都幾大下但太新太公整唔係我杯茶,根據歷史呢依度1930年已經有,而出名既係神像,劍同埋聽講係全香港最多獅子既廟,神像同劍聽講都係自己飄過黎既,而獅子呢真係唔知有幾多,後尾問廟祝有幾多獅子佢話入面好多都係貔貅黎架喎,哈,而佢既石柱同埋用磚仔砌既石像,我覺有d似台灣桃園老街既廟,出門口時見到有個木雕好靚,又再問廟祝依個係咩,佢話叫彩門,分三層代表天地人,用黎裝飾用既,玉虛宮係拜北帝既,其中一位水神而多係惠州人拜既,香港多數係拜天后同洪聖為多,都係水神,因香港係島嘛,長洲更多依一類既廟,嗯

之後睇再去左一間老人院(鐘錫熙長洲安老院)入面既天后廟,係長洲最早既天后廟,間廟係比老人院包圍住仲係佢地既廚房隔離,真趣怪,入到去幾古舊,而且牆上既石雕都幾古雅,依類既廟先比較岩睇嘛,天后左右亦有順風耳同千里眼,係幫忙睇下邊度有人要幫既,之前係台南都成日見到,原來係咁用既,係門口見到個郵筒,仲有英國既標誌,寫有ERII,即伊麗莎白二世, E = Elizabeth R = Regina即帝王咁解

食完一餐soso既海鮮飯後兩點鐘再行其他地方,經過其他商會會所聯會白米金鋪等等去左黃維則堂,係長洲既土地物業代理者,由一條習慣法所跟隨,當年長洲既買樓租屋等等全部要交由依度負責,直至1995年先至取消,當年應該係長洲一個重要既地方

To Part.02

[16/12/12]
Photo Link <<<<<<<<<<<<<

30 October 2013

拖網漁船 - Part.02

貳零壹年拾月拾肆至日-拖網漁船


大約5點幾就聽到d船員起身做野,因為唔想miss左任何一part,所以就起身睇睇,見到船員已經企左係船尾等緊個網上水,望番出去見到個天有忽好光,以為係日出,但原來係大陸碼頭果邊d燈光,但影上個天度都其實幾靚

大約6點半左右就見個網上緊黎,其中一個船員係度控制緊條繩,聽講d震力全部上哂佢隻手,所以其實佢個角色好倦,因為怕阻住佢地做野,所以我地都行開晒,無幾耐就聽到伯母話無咩魚(聽講伯母都好多年無上船),後尾先知原來睇條繩就知多唔多魚,經驗果然係經驗,好快個網就上左黎,見到有大半包,個fd都話依個係基本消費,2個船員拉其中一條繩,拉左幾下個網就打開左,d魚呢就哇啦哇啦咁沖晒出黎,對於第一次見既我地,個場面都幾壯觀,d魚出左黎後佢地就會羅個筲箕(佢地嗌依個叫璃)出黎裝左最值錢既魚即放入大筒有氣pump度保持新鮮,跟手就會開始分魚同埋掉番d一大pat既水母落海,真係好大隻,但個fd話佢地係網度已經死左,我見d船員就咁抱住掉番佢落海,有d太大隻就用腳踏開佢個頂同身先掉番落海,而魚呢,眼見呢我好多都唔識分既,問番多數係一d黃魚既魚,價錢好平,仲有雞泡魚,尤魚,鱔,同埋其他我唔識既魚,仲有一種唔記得叫貓魚定狗咩魚既東西,佢地話依隻魚要好小心,比佢拮到要即時開船番岸入醫院,因為果種痛係無咩人忍得到,好可怕咁

因魚獲唔係太多,所以半個鐘左右就分晒好d魚,至於其他魚仔,就用魚網畢番晒佢落藍筒又或者一個長方型既細盤度再放冰上去雪住,始終要去到下晝先賣魚,所以要雪住佢

咁呢,完左第一網,個網當然又番番落海繼續拖,丫,唔記得講,係第一網當中太陽出來了,但睇唔晒成個而且個天有d灰,所以一般,仲有完左網時樓上唔知點解會倒水,仲要好多下,唔知係個網定係上面攪咩有咁多水要倒

等左陣就上左樓上睇下景,原來細船所行既地方同之前去camp去其他島既航道唔同,行既地方係島與島之間,有時同個岸好近下,其他船可能大隻d,所以唔會行依條路,原來香港有另一種景色,見到真開心

入左control room,睇左兩個mon,一個係雷達,要黎detect d魚既,知道邊度有魚群就會過去拖,另一部呢,唔記得問係咩,哈

出番去甲板,有早餐食了,係海鮮早餐,可能見蝦蟹唔多,所以就煮晒佢黎食,新鮮既當然好食,後尾仲有尤魚,真係唔用點咩都已經好好食

之後呢吹下水睇下景咁,島與島之間有d霧氣,好有一種桂林既感覺,除左船既摩打聲相當寧靜,感覺真好,聽大佬講,原來係海面平靜既一日(佢地叫浪靜),所以隻船無咩點拋但海面就比較多垃圾,因無咩水流所以浮晒係面,但都算ok既,起碼唔搖我可以自由活動多少少,雖然食左暈浪丸但我都驚頂唔順,聽大佬講有次打風d浪打到上甲板成個篷都吹走埋,行船有時都幾可怕,雖然我只試過一次出外海坐大飛,真係登到羅友唔痴椅,但都叫頂得下,唔知點解果時又無咩感覺呢

番落樓下見船員食緊飯,都係一d就地取材既魚呀尤魚加埋d蛋同少少菜咁,其實我想試下食ed飯架,姑終無咩機會,但可能佢地驚我地唔慣,所以lunch係預我地燒野食既,話可以打發下時間嘛,雖然我都未試過係出住海咁係船上面三百六十度海景燒野食,但我都係prefer一般既水上飯食送多d,不過唔想太煩同埋驚船員唔夠飯食,所以就算了

8點零鐘開始太陽光打上d島度,幾靚,而遠望就已經係鹽田港,聽大佬講,我地除左係島與島之間行,另就係香港條邊界度行,仲見到一個叫鴨洲既島,似係一隻鴨扒左係度飲水咁,哈,仲見到d紅石,唔知係赤洲定係紅石門了,仲有見到好多白鶴係岸邊休息同埋飛飛下搵野食,同佢真係好近,不過我唔識打雀,所以基本上係影唔清既,哈

之後撚下狗又食下生果咁,而且唔係大風,有少少太陽晒下,個感覺真係好正

睇到船頭既魚乾,原來係哂緊雞泡魚乾,佢地話係大陸人先敢食,香港既漁民都唔會要雞泡既,見到好多烏蠅嬲住晒d魚乾,都其實又幾可怕,不過哂咸魚係咁架啦

9點半左右第二網,比第一網拖少左時間,上水既魚唔多只有3分一個網,開網果然少得可憐,唔知係咪關太浪靜既關係事,睇下d魚,都仍然係黃魚最多,睇真d水母,原來佢透明既身入面有好多魚仔係度,第一次見,見到有條mok皮魚,個樣好怪,睇左陣就上番甲板了,可能早餐食得太少,有少少肚餓,所以開始燒野食了,除左基本野就當然有海鮮啦,伯母揀左d好野燒黎食,又係咩都唔晒落,好正

無聊中睇伯母湯魚,一刀切頭一牙開身再一拉,d魚腸出晒黎,乾脆利落,而且伯母話水上人中意食細魚再多骨魚,咁先至好味喎

11點半左右最後一網,我去左船尾睇,見到另一隻船靠得好近,而海上面既浮波越黎越近,之後就連個網同d浮波拉晒上黎(之前兩網都係只拉個魚網尾上黎,d波留番係個海),所以令次咩都拉晒上黎,就拉左好多垃圾上黎,有爛椅,爛木等等,聽大佬講唔好掉番佢地落海,但有d船員唔聽,後尾先知原來唔係環保既問題而係如果係果度掉番落去,下次又會網番上黎,所以佢地羅左d垃圾上船就會拋佢地落另一d唔會網魚既地方,哈,見伯母咩都飛落海,都知依個係水上人既習慣,不以為然了

第三網上到黎,見到有兩條大魚,而且有d叫黑立既魚,仲有d貴價魚,雖然唔多量但都叫回本了,聽講一船出海要兩桶油,兩隻就係四桶,所以一定要有貴魚先可回本

之後去左高流灣賣魚仔,見到好多魚排係度,有船仔埋黎買,就係細細條用桶又或者盤仔用冰雪住果d,就咁一桶又或者一盤盤哇啦哇啦咁倒晒落隻船仔度,我以為係用黎做魚肉魚旦,原來係用黎餵魚,成60蚊一盤又或者220蚊一桶,大佬話要8桶先夠一桶油,所以如果無貴價魚又或者多魚獲都幾惡做,但香港既拖網方式同埋雷達,邊有得咁多魚丫,d魚都未生大就網晒上黎,政府收埋魚牌都唔知係好定壞,對於魚黎講當然好,但對於食魚既市民黎講,只有越黎越貴啦

過埋塔門果邊再番大埔既魚排先賣晒d魚,都唔係太好生意,最後上番批發市場,已經有魚檔人係度收魚,要既係尤魚又或者係其他貴價魚,至於果兩條大魚,一條番到去已經死左(可能個桶太細,應該唔關羅佢出黎影相事掛),聽講都係70幾蚊斤,即400幾蚊,都唔錯啦,唔知買要幾錢呢?

走前比左d魚我地羅左,又羅左一d自家制既馬友咸魚,我地名乎其實既又食又拎,真係有點兒唔知點咁,真係打攪晒了幾日後原來fd既其他親戚上左船,見movie拍到好大包魚,真係上晒天花,好勁呀,可惜我地見唔到,但依次上船都係一個幾特別既經驗,有趣

Back to Part.01

[14to15/12/12]
Photo Link <<<<<<<<<<<<