30 April 2012

鼓浪嶼 2012-04-19to22 - Part.02(20Apr)

鼓浪嶼

20 Apr 2012 Fri 鼓浪嶼 Rainy day

一早諗住8點起身依早餐就出發但原來要8點半先有得食,之前一晚揀定食咩,食落都算ok
差唔多9點幾先出發,一出無耐就行左去一間大屋,好舊好舊,入左去睇居然見有人住,問左聲之後就影下相,見佢牆度貼左危樓既牌,成個感覺都就快爛既樣,但地下仲有人住,真係睇就好住就應該環境好差

 再黎經筆山隧道行左出去另一邊,環境唔錯,首先行左買左張可以去到4-5度地方既套票,要成百蚊都幾貴,第1站去左日光岩,可能係大霧既關係,咩都睇唔到,所以感覺冇咩特別,只係好辛苦咁先迫到上先日光岩個台度,星期五既平日都咁死多人,假期都唔知點行
第2站去左百鳥園,一入去就見孔雀開屏,幾得意,再行入少少見到其他雀,有d仲話係一級保護雀,不過真係幾靚,有隻白色帶燈色長尾既雀又有隻全身金色既,真靚,見過佢地後覺得其他都好普通

 去下一站前搵左間cafe坐下,飲左杯25蚊都幾貴既莓汁,不過都算幾濃幾好飲,之後過左寂莊花園,海邊又係好死多人,係山望落去真係人山人海(不過以中國黎講,真係唔算係咩),環境呢又係冇咩特別,反而落山度見到間大屋,一整條木樓梯感覺好舊,正,岩晒我

行左陣本來諗住去風琴博物館,不過搵唔到最後算數了,落番體育館果邊跟手上左條斜路,又係一連串大屋舊屋,係其中一條巷仔度入左去,見到兩間古老大屋,門前有一條長樓梯,感覺古舊,真係日頭都落有番咁上下氣勢同恐怖感,行左上樓梯頂望入間屋,d光打落黎加埋個感覺,真係我都覺恐怖,所以相都冇影就行番落黎,哈

之後出番town食lunch,諗住搵間野食下沙茶面,點知就開始落雨,求其入左一間鋪食,嗌左沙茶面同出名既土筍凍,不過其實唔算太好食,特別係沙茶面,好死多油,個魚丸就同之前一晚既爭好遠,應該係間野整得唔好食,所以花生湯我地冇係度食

街好大雨,食晒野後走人都係好大雨,去左張三瘋飲奶茶,咁岩有位就坐低飲,奶茶唔錯底有d杏片同提子乾,感覺幾得意

 因太大雨既關係,決定番酒店先,大雨到真係鞋都濕埋,洗過面吹下d鞋同襪後坐多陣就出發食晚飯,雨好似比之前細番d,基本上出到去都唔知食咩,又可能係落雨既關係人少左d靚女亦唔見晒,行左陣就搵左之前一日經過一間落地玻璃既餐廳食飯,都係食西式野,本來諗住食扒後尾唔記得咩原因就冇食到,求其嗌左plaza,意粉等等,野真係唔多好食好一般而且都幾貴下,所以我地都冇食其他野,後尾又想起之前一晚既魚丸,就專登走左去食,之後係咁易行下supermarket,冇野買,行過一間食花生捲雪榚既野,加埋芫茜個味道真特別,之後已經冇落雨就慢慢行番酒店,日同夜既鼓浪嶼真係完全唔如感覺,非常不錯

To Part.03 - 鼓浪嶼

<19to22/04/12>
Photo Link <<<<<<<<<<<<<<<

Tucker & Dale vs Evil


~~Tucker & Dale vs Evil(雙寶鬥惡魔) - [2010]~~

有趣的電影有趣的格局,一開始的怪異二人組對答及反應也極和shaun of the dead的孖寶相像,反轉主流電影格局的手法也感覺相雷同,一連串的誤會意外串聯而成的故事,幽默惹笑但不失圍繞本身認真探討的題材,很不錯的電影

<29/04/12>
Photo Link

29 April 2012

ZOO

~~ZOO 生きて行く五の物語(Zoo,繼續活下去的5個故事) - [2005]~~

詭異奇特的短故事,當中以第1及第2個最好

Story 1 - 小飾與洋子, 恆久的不幸偶爾遇見幸福的滋味時最終究竟是幸福還是不幸?故事充滿悲劇不幸及殘忍感覺

Story 2 - Seven Rooms, 氣氛比較懸疑恐怖,但滿有趣的故事,處理得相當好

Story 3 - SO Far, 小孩處於父母爭執之間的難處及痛苦,隱形人的故事,特別的手法

Story 4 - 向陽之詩,教曉世界的孤獨者生存的味道

Story 5 - ZOO,處理得不太好的故事,時光流逝相片死亡,氣氛擺設還可但尾段故事含糊,有多此一舉之感

<29/04/12>
Photo Link

鼓浪嶼 2012-04-19to22 - Part.01(19Apr)

鼓浪嶼

19 Apr 2012 Thu 鼓浪嶼 Rainy/Cloudy day

本來諗住搭10點機去到廈門都只係12點幾,起碼入到去鼓浪嶼都仲有半日玩下,點知遲到check-in既關係(已經早左個半鐘去,點知個自動check-in攪左一大輪最後都唔得,再去排隊等到就得番2個位,果朝早應該係有問題,唔是邊會咁耐先攪一個攪到咁死長龍)去到已經唔夠位要登落下一班12點幾既機,不過都upgrade左去b-class同補多400蚊另加75蚊coupon,本身因只係諗住早d去搵酒店同埋有時間行下,不過應該去到攪得黎都差唔多天黑,anyway,因有coupon所以去左T2飲茶,等到12點幾上機,點知又因天雨關係,係機入面又再delay多40分鐘,卒之攪到3點幾先到廈門

羅完行李搭埋的士去等碼頭都已經4點,其實本身唔用咁耐,只係一上車個司機問我地行隧道定海邊去,因未去過當然係揀海邊,跟手佢就係咁掛住介紹地方,又樓價點貴點貴,金門,跟手海灘海灘海灘,雖然我都估唔到原來金門真係咁近,但架車慢到爆炸,我已經唔再想聽佢講野,最後用左成80幾蚊成四點先到碼頭,唉

平日既碼頭都好多人,好難想像拜六日會點境況,買過飛後就上船,船下層係冇位坐,所以全企位,望向對面因天氣唔係太好,朦朦咁,不過原來個島都幾大下,起碼大過長洲好多

上到島就開始搵酒店,間野叫鼓浪嶼永順科林斯大屋,但就聽講好難搵,我地行左幾個街口先搵到果條街,跟手入左龍山洞隧道,依條隧道同台南既西子灣隧道有得fight,又係好raw既感覺,而且比西子灣更長更寬,有趣

行左出隧道就繼續搵地方,跟門牌呢就有可疑,唔跟入左去小巷就仲煩,我地唔想搵到天黑所以就跟大路行,最後差唔多5點先到都攪左成個鐘,check in就入房放低野,我地係住地下既房,係正好靚既樓梯口,門口有舊式疏化,依間野有成百年歷史,而且好大,但我地訓地下應該會比人上上落落嘈死,所以想換房起碼冇咁嘈同埋有街景睇下,點知佢話樓上只有大房,唔岩我地,哼

不過間酒店真係幾靚,地下有個好舒服既大廳,旋轉樓梯上去二樓又有一個大廳,對出既露台好舒服,仲有三樓同天台,完全係古老大宅既格局,非常不錯,而且3日房租加埋早餐每人都只係4百幾人仔,不錯

放低野洗過面就出發行下,問左酒店搵左條近既路,原來我地入黎時兜多左好大個圈,雖然都唔算係太跟佢既指示行,但都比第一次入去時快左好多

出到去town,好多鋪但其實在我黎講冇咩特別吸引,跟手行左入去佢地既街市,好細亦冇咩特別,到左搵食時間都其實唔知食咩,因舟車勞動同埋搵酒店行左一段時間既關係,所以其實都好倦,後尾就搵左間個樣四四正正叫隨意小吃店既鋪頭食小菜,意外地間野除平之後原來都好好食,佢d魚丸多汁又幾好味,4個人食加埋飲酒埋單都好似係80幾蚊,都唔錯,丫,我地差唔多食完時就見有公安開左幾架細車黎(鼓浪嶼基本上冇車行,有都只係用電既細車行)佢地一黎就唔理咁多野都唔講就搬係街既野上車,我地同老闆講有公安,佢地即刻搬番晒d木台登入番鋪,好快手,哈,原來比公安收左d野每樣都要?錢,所以佢地收野好快手,睇住公安車一路行一路收野,d人又一路搬野,有趣

後尾太倦既關係,雖然冇雨都好快番酒店,條路雖然有燈但都算幾黑,不過夜晚既街同日頭唔同,有另一個感覺

丫,爭d唔記得,原來鼓浪嶼都好多靚女,唔知係台灣人定係咩人,總之出現既頻率非常高,香港可能幾日先見一個既質數佢局然一晚有最少7-8個,唔知係人流集中定點lu

To Part.02 - 鼓浪嶼

<19to22/04/12>
Photo Link <<<<<<<<<<<<<

28 April 2012

The Armoire

~~The Armoire(衣櫃迷藏) - [2009]~~

一套充滿了隱喻的電影,衣櫃牛奶甜圈雪榚遊戲及鏡頭企位等等實在太明目張膽了,以一個詭異的開頭配上適當的配樂及剪接形成一宗失蹤案件以外另有意圖的事件,頗特別的表達手法

<28/04/12>
Photo Link

17 April 2012

2007年凱撒電影節官方短片精選集


~~Sélection Court-Métrages CESAR 2007(2007年凱撒電影節官方短片精選集)~~

相當不錯的短片,有不同類型有些難以理解有些手法比較抽象,但值得用心思考耐心一看

À bras le corps(盡一切可能-2005) - 懵懂但內心明白想保留兩兄弟一起的最後時光,效果強烈而感人

De sortie(離開-2005) - 無聊帶點強迫症的示範,總感覺是一位生活在壓力下的悶蛋

Flesh(血肉-2005) - 借助比較形化的表達去諷刺及消滅美國一直以來的自戀及自瀆行為,極有趣的短片

La leçon de guitare(吉他初體驗-2006) - 沈靜重覆學習單一樂曲和出現於教琴老師家裡的不明人,主角對結他的熱情對比冷漠怪異的關係所得出來的感覺頗有趣

Les volets(百葉窗-2006) - 忙裡忙外的助手找到體諒一刻的感動,簡單而真摰

Présences(在場-2006) - 故事是表達對故人的想念之情

Bonbon au poivre(辛辣糖果-2006) - 有趣的師生/上司下屬關係,工作過後你我也是常人,喜歡

Cindy: The Doll Is Mine(照相-2005) - 故事太難理解了(後來才知是一人分飾兩角),太多支體動作但畫面及女角很漂亮

Fais de beaux rêves(甜蜜的夢-2005) - 一個轉變是否能改善現實的不足?冷靜抽離的表達不如意和尋找打開缺口的渴望

Histoire tragique avec fin heureuse(Tragic Story with Happy Ending,悲傷故事的美好結局-2006) - 題材特別,風格及畫面強烈的動畫,禁制不住的思想,想要逃脫肉身的咖鎖,最後投奔忠於自我的自由
Portugal | Canada | France

Quelques miettes pour les oiseaux(有關小鳥的片斷-2005) - 令我想起教宗的廁所,貧窮落後艱苦中寄望轉變,可惜一窩蜂過後只帶來失落多於成功
Jordan | France

Le mammouth Pobalski(波巴斯基的毛象-2006) - 不全的版本,只在網上找到破碎沒有字幕的片段,一知半解可惜了

<16/04/12>

16 April 2012

Street Kings

~~Street Kings(夜行悍探) - [2008]~~

因為是主角,所以就像神仙一樣一個還是一百個最後也死光光而自己就依然步履如常的踏著自己的路全身而退,太神奇太有型了,而且不用理由就找到一個出生入死的拍檔一同遇神殺神,主角魅力真是驚人,最後扭來扭去囉唆一輪後太陽下山加一個落寞COOL爆的側面劇終,真是TMD令人感慨萬千

<15/04/12>

15 April 2012

講事講碑及跑馬地墳場

參加左個導賞團去睇睇香港既墳場,個名叫"講事講碑",之前一次去灣仔大靠山尋寶之旅先知道原來跑馬地有幾個唔同宗教既墳場,今次開既導賞團當然我唔會錯過

星期日一早係Queens' rd E既帝盛酒店附近等,我地去既係香港墳場,位於回教,天主教墳場既側邊,地方都算幾大,算係香港既第一個墳場,聽個guide講係1845年已經係度,主要係東正教同基督教既墳墓,整體有二萬幾個墳當中只有幾百個係華人既


入到去環境唔錯,有好多樹亦有一個現已乾水既噴水池,鳥語花香咁,唔錯,但聽guide講夏天好多蚊,所以最好其他日子先過黎


今之主力唔算係介紹墳場反而係講解當中墳墓主人同香港既關係,首先第一個係William Brodie船長,碑上寫死於1841年,聽講原本唔係葬係依度,本身係係日月星街果邊但後尾搬左過黎,因為已經百幾年歷史,碑上既字某d已開始蕪湖不清,但隱約都睇到大部份,william Brodie係第一位入住香港墳場場住客,亦成為快活谷有莫大關係既一份子


再前少少有參與簽署南京條約船上士兵既記念柱(入面應該冇屍體既),年份寫住係1842年,但已經好朦,再行前少少係香港第一名華人政務師亦係警務處長D.R.F Caldwell(高和爾),唔太清楚咩國籍但就識得中英文,所以官位好大,而且仲係相當有名既貪官,仲因出面保釋海盜黃墨洲而更出名,而且佢有一個中國人老婆亦係相當有背景及有辦法之人,碑上亦有直角尺同圓規既共濟會標誌,個碑可能因為有圍欄,所以保存得唔錯


再行前少少有一個教堂,係香港既一級歷史建築,望入去好似咩都冇,但因外面一地既木棉花,環境幾靚,佢旁邊既係另一個墳,係郭士立牧師,又係懂多國語言做翻譯工作,開頭做官後來傳教,一方面係中國傳導人既主要份子另一方面又比當時既政府視為間諜,但佢就因係傳教先鋒,所以同巴勉會,巴色會,巴陵會以及道濟會都有好大關係,隔離仲有william morrison既碑,終於1853年,係一個備受尊重既衛生處長,仲有一個係香港第一位用哥羅芳既醫生,個名唔記得但都係衛生處長


行前3-5分鐘度,去到何啟既墳,佢父親何福堂係第二個中國人傳教士,而何啟就係醫生同律師亦做過官,個墳除左佢自己仲有兩個老婆一齊葬,用太太遺產起既醫院Alice Memorial Hospital就係孫中山讀書既地方,估計何啟幫助孫中山思考革命有關,另何啟既地亦係起左啟德機場


最後仲有革命份子楊衢雲既無名墓碑,只有6348幾個數字,仲有溫清溪,關元昌洪春魁,等等都係同革命有關,後尾行左去何東同埋遮打(Paul Chater)既墳,仲睇到有關於鴉片戰爭既海員之墓Men of HMS calcutta等等,如果熟悉又或者對香港歷史有興趣既人黎香港墳場都幾有趣


之後行左去半山既日本人墳場,係一支支既石墳,香港比較少見,而且大部份係女性,聽講係早期比較窮既女性被賣過黎香港做妓女,所以墳地唔受尊重後尾仲比人搬左上去半山,行前少少仲有萬靈塔,1919年,係一d冇人認領客死異鄉既日本人既碑


後尾tour完左我自己過左去隔離既巴斯墳場(亦即係拜火教墳場),1852年,地方唔算大墓亦唔算多,最出名既應該係麼地 (hormusjee naorojee mody)同律敦治(Jehangir Hormusjee Ruttonjee),墳既外形唔同香港墳場,佢地既碑比較矮又或者係一大個石棺,感覺上比較整齊但就極似私人地方,所以基本上冇咩人只有工作人員係度淋花亦唔多比人影相

出番去行左天主教墳場,感覺上雕塑多d比基督教墳場華麗一d但因墓碑面積比較大所以亦顯得好迫好窄,但又係另一種墓碑特色


再去左回教墳場,有d碑好似清真寺咁有個彎彎地好似屋頂既設計,有我唔識睇既文亦有中文而且有星星月亮圖案,而所面向既方向畫一同巴斯墳場一樣係矮矮既石碑再有埋葬既地方,但拜火教係字向埋葬地但回教係背向埋葬地,又係另一特色,我行左上去最上層既墳,地方環境清優,感覺相當良好

後來番到屋企再睇網上資料,原來巴斯墳場前少少仲有個猶太墳場,miss了,下次有機會入去睇睇

<25/03/12>
Photo Link <<<<<<<<<<