28 January 2012

太陽之旅

~~Günese yolculuk(Journey to the Sun,太陽之旅) - [1999]

感覺淡淡而無力的故事,主角本來是平平凡凡的生活但因一次種族暴動而認識了一位朋友,從而禍事連連,戲中主角對每事也看得很淡很甘於受命,直至朋友死去他才收起隨遇而安的想法,積極去做自己認為對的事,可惜很多東西對一個充滿變數充滿危機地方的小市民來說並不容易,整套片也是灰朦朦,人物就是介乎於壓抑和默默承受之間,相當前無去路冷冷清清的感覺

<27/01/12>

27 January 2012

The Dead

~~The Dead(屍地餘生) - [2010]~~

比較特別的喪屍片,地點發生在非洲,戲中的喪屍很落力,眼神動作真是很入戲,而特技也可,比較特別是故事的取向,雖然前段比較無聊但後來漸入佳景,全片主力在親情友情,而且是為著最基本的生存而進發,所以困境亦相當之多但善意的人性描寫亦不少,雖然說教意味明顯,但ending的pandora box收得尚算不錯

<26/01/12>

26 January 2012

Meute La

~~Meute La(The Pack,o靚妹腎探母夜叉) - [2010]~~

這是什麼東西?開首不錯,灰暗的天氣野性的女孩不明的陌生人鄉村的咖啡室充斥濃濃的不安感覺,再來是一貫的公路血腥橋段,除去了每次受害者拾到電話後忘記關機的討厭場口外,到這時還可,再後來就真是想不透換血什麼巫術什麼,喪屍什麼,它們的行動它們的行為差點以為自己是在看外星人片,come on,我絕對有理由相信這導演之前是拍mv的,另就是浪費了片中的演員,講到尾就是令人摸不著頭腦,血腥不足暴力不夠的恐怖片

<25/01/12>

25 January 2012

The Onion Movie

~~The Onion Movie(洋蔥電影) - [2008]~~

看似無聊但其實又帶相當的社會諷刺,加上美國人的特有西方主義,很瘋狂古怪但又不弦失外之音,看似正經但一下字又走回無理頭,跳接太快有時真的找不住,可能好像他們對自己的品評只是一部庸俗低檔次的鬧劇披上諷刺的外表而已,相當smart的製作人,一切也一早說明,對評戲人的笑駡也相當抵死,好一個單刀直入直搗黃龍

<25/01/12>

J'ai toujours rêvé d'être un gangster

~~J'ai toujours rêvé d'être un gangster(黑道快餐店) - [2007]~~

由開首步入餐廳響起Casey's Last Ride就很對味,女主角正翻了,整個感覺就是隨意悠閒,夾雜荒旦,但不乏人與人之間的溫情及人味,平凡無聊的過日子也有點點天馬行空的想法,整個就是詩意而浪漫

<25/01/12>

24 January 2012

Lana Del Rey

聽了Lana Del Rey2張碟及一張快將推出的leak album部份歌,覺得這位25歲美國歌手極有潛質,或者先說說她的碟

第1張是網上作品Lana Del Rey - AKA Lizzy Grant,用的是舊名lizzy grant,歌比較散,看不出想要的風格,但聲音就有種特別的感覺,充滿情感力量又帶點點傷感而且某些更頗creepy,怪怪的風格,但在這張網上大碟只是看出部份潛力而已

再來是另一張ep,用的是改名後的同名碟名Lana Del Rey,一首video game相信是最為所熟悉的,聽時極有意境,充滿磁性加上夾雜古雅性感又帶點野性的外表,不難成為焦點

最後是快將推出的Born to Die,聽了當中幾首歌,感覺不錯,有足夠的流行空間但又帶點邪氣,雖然如此但相信在amy winehouse後所出來差不多類型的女歌手實在多的是,現在除了某些歌及外表帶點突出外暫時沒有其他個人風格,努力吧

Try This Song : (1st album - Lana Del Rey - AKA Lizzy Grant) Mermaid Motel
(2nd EP - Lana Del Rey) Video Game
(3rd album - Born to Die) Diet Mtn Dew
Official Website : http://www.lanadelrey.com/

23 January 2012

三聖村漁船bbq


講左都有一段時間既漁船bbq卒之成功舉辦,係一個冇咩陽光有d毛毛雨既星期六舉行,地點係朋友屋企人泊係三聖村既漁船,人呢就如志明講十個救火的少年,最後得番9個人成行,但野食我就覺得非常ok,多謝mui人係大埔買既魷魚同埋羊肉,而係旺角買既黃心番薯亦好好味,仲有自家製既魷魚干,用黎燒好正,仲加左d搵左好耐先得少少佢地話係98年既豉油,話好味d喎,不過我就分唔出了,哈

係三聖雪廠附近既地方坐駁船上船,朋友一再提醒要小心電話同埋其他野,因上船時好易就會跌落海冇得執番,講左冇耐就聽駁船上面既人講岩岩琴日先跌左個電話落海,果然係成日發生既事情

隻船唔係泊得太遠,亦比我想像中既大漁船有d距離,但放十幾人完全冇咩問題,第1次上漁船真係幾新奇,落左黑蚊蚊既倉底,第1次見咁大個engine,上番去睇下d房,好簡單既木板設計,再上上層睇左駕駛室又睇左對出既甲板,如果大浪時應該都幾搖,但因好多架船拍埋一齊,所以就比較平定d

睇完就去砌爐燒野食,用既係一個切開左既大油筒,但因d炭可能放得耐超市比較濕,有d難著,後尾倒油上去先好少少,再發覺原來冇買蜜糖所以就要嗌駁船出番去買,咁我地就食住d唔洗用蜜糖既野先,一路食佢地一路話好dry,等左好耐蜜糖先生先番到黎,真係天光等到天黑,哈

燒燒下又發覺點解去到三聖村都唔買d海鮮去燒,咁多人都唔記得左真失敗

雖然話唔係好搖但有水警或大船經過就會有浪,其實怕暈船既都可能會有少少唔舒服,咁岩係唔知咩日子,好多人都出晒去飲宴,所以就得番好少船係開燈,入夜後個感覺都幾得意,我仲過左幾隻船度去餵貓,基本上佢嘈左成晚,可能肚餓掛,用獅子狗餵完就唔再喵(朋友見我一野將5粒獅子狗袋落褲袋既行為好驚訝,已經一手電筒唔想為左羅住野自己跌落海,哈),不過佢都好怕人,我入左佢隻船佢就好驚咁退後,餵晒佢又要爬番幾隻船番去,其實都落緊毛毛雨,要小心唔好跌落水

最後都燒到11點等朋友大佬番黎我地先走,可能出面仲有好多船,等隻駁船番轉頭都等左一排,爭d以為冇船走,不過上落都真係要小心,有雨既船面好滑唔小心會跌落海

講開左要跟一次出海捉魚,但就要冇咩浪既日子先得,期望果日既來臨,始終機會難得呀

<14/01/12>

Kelly Clarkson - Because Of You

無意中又睇到Kelly Clarkson之前既作品Because Of You,諗番起依個mv拍得非常不錯,歌固之然好聽而且個故事亦拍得相當感人,停一停想一想勿因一時之氣而令事件不停循環

諗諗下佢係上年年尾出既新碟原來我都未聽,得閑搵黎聽下先

22 January 2012

越南,柬埔寨 2011-12-25to2012-01-04 - Part.11(04Jan)



晨早6點左右起左身,打開窗簾走出露台睇睇咁岩見到朝早既金邊,又係紫紅色既天,冇咩厚黑雲應該又係一個好天,good

係old market附近食過早餐後就番gh checkout,放低行李約好去機場既時間後就出發行埋剩番落黎既行程,因我係包兩日車而ed景點就非常之近我gh,加上7點機既關係,當然唔會浪費第1,2日既車錢去d咁近既地方,所以我先有時間去左金邊既郊外,時間安排得非常不錯,哈

ok,第一站經一條short cut出番去Wat Ounalom(烏隆寺),因之前一晚行過依個社區時見到好多舊樓而且非常之地道街坊感覺,但因太黑咩都睇唔到所以今日一早就行依條路出番去烏隆寺,果然好多舊建築而且感覺比較寧靜,不錯

出番路邊行過去烏隆寺見正門位關左所以就唔浪費時間搵門口入(都唔知開幾點同埋本身都係plan有時間順手先睇埋)

跟手跟住馬路行去National Museum(國家博物館,usd3),入面都幾多野睇而且相當值得入去慢慢行慢慢睇,入面有好大個既側身毘濕奴像,八手毘濕奴像同埋我最中意既闍耶跋摩七世雕像,佢雕刻得非常之靚,線條表情真係靚得好緊要,另仲有其他係吳哥搬黎既石刻又或者門上面既雕刻,依度可以近距離咁慢慢睇真好

用左成個鐘睇完d展品後就出番去諗住行下皇宮,點知睇番本書先發覺原來11點至2點半關館,oh no錯晒,應該睇左皇宮先去museum,anyway,快快手行去皇宮,但搵個門口都搵左一排,而且仲要未夠11點已經關左counter,諗住買定ticket2點半後可以直入去都唔得

只好行番出去睇下邊度有地方比我hea下食埋lunch,行番出河邊時有個講國語既人行埋黎問我係咪去睇皇宮,我答佢係但已經關左要晏d先有得睇,佢就話如果我未買飛佢可以讓張飛比我因為佢話之前入左去入面冇收佢張ticket喎,我梗係唔信佢啦,我唔會慳果少少錢都唔知係咪假飛,ed野點信得過

行番去河邊搵左間比較舒服既餐廳坐下飲下咖啡睇下書咁,之後見肚餓又嗌埋lunch慢慢食,卒之等到1點半左右就慢慢行番去買飛既門口排隊,好彩早到所以算係頭幾個,因我攪錯左次序得番好少時間睇皇宮銀宮等等,所以時間要control得非常好

用左非常貴既6.5買左飛入皇宮睇(包埋銀宮入場費),時間唔係用左太多,睇下d建築又入左登基大殿睇睇就走人lu

係果度再入埋Silver Pagoda(銀宮,銀佛寺)睇,首先睇左銀佛寺主殿,入面既銀磚地板,金銀佛像同埋其他金銀製品鑽石皇冠等等好靚好貴,我最中意係佢既玉佛像,成個翠綠色真係好靚,但因唔比影相所以我只好不停咁遠望,佢d綠色實在太靚,再之後出左去睇左黃金佛腳,好大隻,出面仲有其他國王既佛塔同埋非常古舊而且好長既壁畫,最衰唔係得太多時間所以只可以睇左一部份跟唔晒睇埋成張圖

離開銀佛寺時已經3點2,因我仲諗住沖埋涼先去機場,所以快快手行番gh,順手經過買左支粟米諗住食埋佢地最出名既野先離開,番到gh羅左要換既衫快手沖埋涼後就出發去機場,果然有少少塞車但未到5點交通還可,去到機場4點3左右counter都未開,依個機場雖然細左d但感覺還可,等下睇下相睇下書就ok check in.最後大約6點半左右準時上機,但番到香港都成10點幾而且仲連日本既機一齊,所以行李真係等左好耐,嗯

整個行程雖然比想像中貴,但勝在自由自在,見咩食咩而且都幾岩我食好彩冇肚痛,但天氣就非常非常之熱,好難想像夏天時點去越南,柬埔寨,anyway,吳哥我會再去不過要睇下連埋咩地方,或者Laos(老撾)又或者Burma(緬甸)都唔錯,嗯

吳哥比我印象最深係d石刻,特別係偏遠少少既細寺,佢d雕刻非常細緻,好多像就好似人一樣你完全知佢本身如果係真人佢個樣係點,表情精細,好值得慢慢去睇,我相信冇咩地方可以比你咁近距離冇任何阻隔可接觸ed咁多年前既古物,但都希望d遊客可以小心d保護ed古蹟留番比後代可以慢慢欣賞而唔係為左自己既一張半張合照去破壞佢地,我亦希望果d導遊可以盡番保護ed古物既責任而唔係去教d遊客點去爬上去羅個好角度,ok?


<25/12/11to04/01/12>
Photo Link <<<<<<<<<<<<<<<

越南,柬埔寨 2011-12-25to2012-01-04 - Part.10(03Jan)



8點出發首先去old market度睇下有咩早餐食,但又唔係肚餓所以唔想坐係食野,就出左出面睇下有咩買,係附近買左2個即整脹卜卜既包又用2千柬紙買左一疏蕉(本來只想買3隻但佢聽唔明我講乜比晒6隻我,算了4蚊港紙,由佢)

之前睇過有時間,所以想去下金邊郊區,第一站去左Udong(烏登),因地點比較遠,所以要25蚊(一個鐘車程,之前睇過要30蚊佢都話計平左比我),由市區去既路比前一日冇咁大塵但都尚算ok而且幾多郊外景睇,感覺不錯,但個天好大舊黑雲,仲要出門時唔記得睇天氣放低左把遮,上山落雨就慘了

去到Udong未夠10點,幸運地個天好番好多,應該唔會落雨,而且仲好曬下,good,因平日既關係冇咩人,但司機應該都係第1次去,唔係太識路佢車左我去遠少少果邊既停車場,所以就要由地下行五百幾級上去頂,udong本身係柬埔寨既古都,佢有3條樓梯,1條最短叫LadyStep,另一條叫舊ManStep已經冇人行,而我行既就係最長既新ManStep,唉算了

係入口已經有個後生仔跟住我地架車係咁問我野,本身我想自己用書行上去,但見佢係咁問又唔開價,而且見過d資料上面每間廟都有人注紮要錢,心諗橫掂要煩都係比一個guide錢算了,所以就同佢一齊上去

個guide英文好好,問佢原來佢係附近讀書,話自己一個人係附近半工讀,主修英文,一路行上去一路講下附近既地方上到頂好開揚佢又介紹下遠景係邊度邊度,頂有一間好新既寺,入面有好多佛像,原來係人地捐既佛手上面又有錢都係祈福用,我又用水沖下個頭代表好運等等,再行仲有3個佛塔,唔同時代唔同外型,再行前有d舊石梯,感覺幾靚,另一個山丘又有另外既寺有唔同既神佛係度,都幾多野睇,而且又去埋18尺高果個大佛睇,雖然岩岩整緊,但個guide問左人就比我地入,所以有時有guide會方便d特別係ed郊外山頭,有d野比較易話為,行番LadyStep落山,差唔多離開時guide想要20蚊話讀書,我當然唔會比咁多,只比左5蚊佢之後就去搵個司機,見佢係正門好開心咁買緊好多野食,我相信依度應該比市區平,所以佢都順手shopping

離開udong見有時間,司機話可以去埋Mekong Island(湄公島),所以就開車去,經唔知幾號公路去湄公島,本身佢話想叫我搭船過去,但比較難講係邊度join番,所以我問佢可唔可以一齊去,佢話要加15蚊因好遠同埋要來回船錢,我話ok就開始去,差唔多用左一個半鐘先去到碼頭,其實都唔算係碼頭只係極為簡陋既落船地方,人有人行車就車駛上隻船,因路面太爛,有時載左重貨既tuktuk就成日都入左泥要人幫手先推番出黎上船,而ed可以載車既船我都唔係第1次搭,之前係廣州都搭過類似既東西,感覺差唔多,不過依度就係睇湄公河景,有d漁船仔又有d沙船係度咁

好快到左湄公島,船上有個o靚仔見我係遊客之前已經係咁聊我傾計又問我去唔去佢屋企睇織布,開頭我都話諗下先,之後架車行過又見佢就入左佢屋睇,織緊野果個係佢阿.好後生,原來織布都要一個月至幾個月,見佢用支野穿穿下隻腳又蹉蹉下咁就係度織,睇完就好自然咁羅d製成品出黎想我買,真係織得幾靚可惜太大我話佢地知我屋企好細冇地方放,佢地又羅d披巾出黎,我話唔岩用所以唔買,不過我都比左2蚊佢地,之後走左就繼續開車去市集,但條路原來非常非常之爛,真係"登"到飛起,又係利害過尼泊爾,唔知係因坐tuktuk關係定點lu,總之就好"登",但睇下周邊村民住d屋又幾唔錯

無幾耐去河邊,原來唔係假日既關係,市集係冇開工,只剩番d水上屋同埋好少人係度,見佢地賣緊生果,就想買黎食下,點知個司機話叫我試下味先,原來酸到爆開,唔知係咩生果我又唔想買芒果食到成手係咁煩,所以睇左陣就上番車走人

離開湄公島既路依然非常咁"登",司機仲話要行10公里一樣既路,我人係咁"登"佢架車都唔好受,我估下次佢如果真係要載人入黎應該要收貴d先得,當中又係經過d村屋,可能近河所以可以出去打魚加上織布遊客所以d人應該有錢d屋都幾靚下,上面係住下面就係散熱同埋織布機,再出就係果園,好多芒果樹,丫,發覺佢地d牛係白色既而且非常之高大,仲高過d馬同人,佢地係拉車拉貨用既,所以好鬼大隻,第1次見咁大既牛,坐番船出去司機問我去唔去之前想去既餐廳食野,咁我就話ok可能佢有下晝食呢,所以去左no problem,點知去到司機話見牌寫住係開6點,所以未有得食,so,叫佢車我番old market算了,因之前見佢附近有post office,我要去寄朋友交代既明信片

番到去old market已經4點,同司機清左條數後(20+25+15=60蚊,都幾貴但去左兩個遠地方都可接受)我就自己行,走前佢一再提點我入到old market要小心個相機同錢,其實依個司機唔錯佢仲比左張card片我,但得電話同柬埔寨文,想問佢英文係咩但佢其實只係識講英文未入過學校讀書,所以都寫唔到比我,同佢say bye後就行左去post office,間野都幾靚下,攪掂張card後見有少少肚餓就番old market搵野食(成日就只係食左2個包同6條蕉)

雖然係no problem食唔到我想食既烤泥鰍同米薄餅,但係old market居然比我見到有人食緊米薄餅,睇下佢點食就坐埋去指指嗌多份,佢係一大盆既野,有肉有菜有米紙同埋1d好似粉咁既上既東西,自己落手整再點魚露酸醬咁,好好食,但之後發覺原來生菜再包米紙再包肉同其他配菜會比較岩食法,但因成手都係汁,所以冇影番個製成品,算了

再之後見仲有時間,諗起前一日經過見到皇宮黃昏時間好靚,就坐左架電單車去皇宮睇下,點知比埋地圖都係唔識,睇gps完全錯方向,所以就叫佢停低架車改去河邊(比埋圖佢睇)自己行去算了,去到比低1蚊就周圍行下,日落皇宮附近都幾靚,買左一包粟米餵下白鴒又訓下草地relax下咁

6點零鐘天黑就番去夜市睇下買咩食,行過見到螄蚶,都幾大隻又生猛咁,所以就想試下,問佢幾錢但聽唔明佢講咩但只聽到one dollar,所以就要左一蚊望落都幾多下,叫佢幫我整埋,見佢快快手倒晒落去個滕籃度放落水一陣羅番上黎就攪掂,加下香港even台灣都唔多見螄蚶又或者好貴,依度1美金咁多都唔理得佢死唔死食左先算,之前見到有燒雞好似幾唔錯,所以就燒雞加螄蚶晚餐,但雞冇一半買所以就買左隻細既,都唔平要成4蚊但就好多唔知咩配菜,番到gh樓下又買左杯凍啡就上番去,老闆見我買咁多野食仲笑我係咪開party,哈

快手沖涼後就出露台食野,螄蚶真係幾肥而且仲有血,好耐冇食過lu,之前食過同埋上次去台灣都係熟晒冇咁好食,半生熟真係最好食,再用手食燒雞,又係一手都係,整日食野都係用手就咁食真特別,卒之都係好飽食唔晒仲要攪到成個垃圾桶滿晒,但個垃圾袋就因穿左,所以d螄蚶汁整到一地都係,最後要抹地同掉晒係廁所個有蓋垃圾桶先得

因第日就要飛所以先執好行李,攪掂晒d野就飲下茶消濟,再訓下床睇下書睇下相咁,但唔知係因我之前連個袋訓過草地定係因我食螄蚶有汁係地,張床無lala有好多細細隻既小強同d不知名既小蟲,殺左3次都仲有,拆左張被冇特別又研究下個枕頭床褥都冇咩發現,地下又唔見有都唔知邊度出黎,殺多兩次卒之冇晒,煩

最後冇咩做,都係11點前就訓左,諗諗下日日都係11點前就訓8點前一定起身,真健康


<25/12/11to04/01/12>
Photo Link <<<<<<<<<<<<<<

21 January 2012

越南,柬埔寨 2011-12-25to2012-01-04 - Part.09(02Jan)


本身約左果個tuktuk driver8點到gh點知唔見人,所以就叫gh既老細幫我嗌車,佢極想我用佢細佬既的士(即係第1日載我番gh既司機),又話價錢爭唔遠而且又舒服d因有d地方好大塵等等,但我話佢知我比較中意tuktuk所以叫佢幫手,價錢比我本身訂果個平,只要20蚊,是但啦如果佢識英文既話,之前一直都唔會太rely on gh嗌車,雖然總比係街求其搵感覺上好d,但亦都係網上見過有衰司機由gh叫番黎,想投訴又或者唔再包車gh又會多野講,所以都係prefer網上搵d好聲譽既,不過金邊tuktuk driver既資料真係唔多,依個都係見有人嗌過話唔錯所以見預book,25蚊一日我都覺貴不過金邊既物價係比siemreap貴而且又講到金邊幾咁唔好安全咁,所以算了,點知佢都係唔見人,算數了

卒之攪到8點半先出發,第1站係去Oreusey食早餐,去到好多好多人,係門口煮野食既地方指左要食既內臟麵(1.5),唔錯但係唔夠係吳哥尾二一日司機帶我去食係郊外鋪既早餐內臟麵好食,果度只要1蚊咋

跟手就到第一個景點Killing Field(萬人塚),都幾遠既地方,車都要行成半個鐘以上,而且經過既地方好多沙塵,比之前所到既地方為多,甚至乎多過尼泊爾,所以司機幫我買左個口罩(係吳哥用完後我就諗住唔洗用果個Scarf放低左,我成日用佢黎遮塵)

未夠10點到左萬人塚(丫,有隻蝴蝶唔知點解一上車就跟住我,爬左係我條褲到一直到萬人塚先離開,搭順風車好奇怪),3蚊包埋audio導賞,一路聽一路睇,不知不覺用左2個鐘,可能之前睇得太多日本同猶太集中營既故事,雖則殘忍但沒太多感觸,只係聽到其中一個故事時有d感動,見地下一個個下陷既大洞,仲有其他grave,殺人樹,magic tree等等,可以想像當時既慘況,後尾入面室內,睇下當中用農民又或者身邊既物件所做出黎既刑具,又睇到一層層排到上頂既頭骨,短短幾年殺左真係好多人,慘烈的日子

之後再去左Tuol Sleng Genocide Museum(S21,吐斯廉屠殺博物館,3蚊入場因導遊要5蚊所以我3蚊買左本書仔睇住就算),佢比較近市區,所以番轉頭又用左d時間,又係恐怖既地方但冇想像中咁大感覺,當中有4座大樓,本身由學校改建,依度係監禁同迫供既地方,再之後就會送到萬人屠殺,第一座樓係一間間房,困住d比較高級既官員,房入面冇咩野,只有床,工具箱同掛牆上面既相展示番當時和平後所發現既情況,時不時會發現天花,牆邊以及地下會有一點點血跡,就咁睇唔會太留意,但當發現後就會知道都相當多地方有,可以從ed既血跡方向以及彈孔想像一下當時既情況,同對出既陽光形成比較大既對比

另一座係比較細小既監倉,用磚又左者木板做成一個個極細既監倉,門上面既小窗比視平線為低,剛好用黎由高角度望入倉,而且係比鐵絲網包住晒,聽人地導遊講唔係為左防止佢地逃走而係唔比佢地跳樓自殺之用,仲有其他大型刑具連圖解,雖然我都買左本書仔知道d解釋,但眼見一個個睇落平常但用法狠毒既工具,想出黎既人個腦真係有問題,後尾去左一個展場,講番當時係s21工作既年青人依家既生活同回想當時既情況,係一d比較遙遠既東西,雖然可能透過電影又或者書等等接觸到少少,但親身去當地睇一d真實既當事人講又係另一回事,感覺總係不一樣

睇夠赤柬既東西就去左Russian Market(Phsar Toul Tom Poung,俄羅斯市場),因佢近我想食dinner既no problem resturant,原先叫driver最後先車我去睇完就可以食飯,點知佢車左我黎依度先,既然黎到睇左先算,入到去好多野買,因太多野係度,所以顯得地方好窄又好雜亂,又鞋又衫又零件眼都花埋,因太熱既關係,只係果度食左個酸酸地既木瓜檬粉,其他仲有好多野食賣,但我真係食唔落,之後又行下市場出面,仲食左個檸檬雪葩,涼下休息下幾唔錯

睇完時間只係4點未夠,所以就去左Wat Phnom(塔山寺)睇完先食dinner,當中經過Independence Monument(獨立紀念碑),本身plan last一日先去,不過其實冇咩睇依家經過左所以可以唔洗去了,去到Wat Phnom(入場1蚊),從粉紅色既外表感覺係比較新既寺廟,佢支撐頂既雕像幾特別,入到去先知其實都幾古舊下,d壁畫有番咁上下歷史而且d古仔又幾得意咁(圖下面冇英文,我只係偷聽人地導遊既解釋)

睇到太陽差唔多落山先走,但因番轉去no problem都要一段路,所以就改左去另一間食,個名叫Daraksmey soup,係食柬埔寨土鍋,我到時人唔算多,但無幾耐後就見好多當地人去食,飲埋啤酒都係5.5,但就同SiemReap食既差唔多

司機可能覺得依個地方太遠同冇咩車,所以就約左我7點半番黎接我,但因佢唔得閑就叫左另一人接我番gh,係行緊去tuktuk時一不留神爭d比架收唔切油既電單車撞親,都話佢地交通差同埋開得快啦,係越南,siemreap佢地會睇住人過但依度真係要自己小心d先得

可能個司機唔係好識地方,放左我係一條街就走左,因度度差唔多樣我以為岩地方就落車,睇番個gps原來都爭緊幾條街,好彩我有gps唔係冇地圖又黑蚊蚊都有排搵

見時間仲早,就順手行下先番gh,今次唔行街市而係行下之前經過既路邊小販,開頭專登唔用大機而用細機影,所以就可真實咁反映出當時條街實際既燈光係差唔多冇咁濟,好黑但又好熱鬧好多野食,雖然我仲好飽但行下行下見有食甜品既地灘,又見到有南瓜布甸,之前一直食唔到所以就搵左檔坐低食,雖然好黑又大塵但好多當地人都坐晒係度圍住個小檔口食野,又好多外賣既人係度等,都幾熱鬧,而且都幾多款式,但我只叫左南瓜布甸,佢同食開既唔一樣,係用成舊南瓜係上面整布甸加埋一齊,食時再加冰同練奶,又咸又甜咁都幾得意

番到gh都未夠9點,所以又係露台度飲下咖啡飲下茶睇下書咁,好不悠閒


<25/12/11to04/01/12>
Photo Link <<<<<<<<<<<<<