31 March 2010

南丫島2008

貳零零捌年玖月拾肆號 - 南丫島

入夜先去到南丫島,夜晚既天氣仍然好熱,bbq時熱到飛起

第二日因天氣好既關係,食過早餐後就係南丫島周圍行下,後尾仲係榕樹灣過埋索罟灣,中途經過天后廟,橫塱村,香草原(入面種左好多種草,用個酒樽寫埋名,幾得意),蘆鬚城沙灘,中間亦經過一條村,名唔記得但有隻了哥好過癮,大叫"果邊呀果邊呀"講果時仲用個頭拗後指示方向,有趣,行左一陣,可能水退關係,當中有一大片泥地,好多人係度摸蜆,構圖都幾靚架

不過天氣真係好熱,行上山頂時係個亭休息到唔多願走,所以大熱天時香港行山有時真係幾辛苦下

順帶一提,入去時見到成船都係外國人,就算中國人面孔但都係講英文,爭d以為自己去左外國機場搭緊飛機,後尾先知道原來有function攪,唔知咩龍舟節,怪不知得咁多外國人啦,哈哈


<14/09/08>
Photo Link <<<<<<<<<<<<<

30 March 2010

Dogtooth

~~Kynodontas(Dogtooth,狗牙) - [2009]~~

一部很怪異的亦很有思想空間的希臘電影,講述生活在圍牆內的一家人,在父親的保護下,子女不受外間事物所影響的扭曲生活,在我們看來非常古怪而可笑,但認真的想想這是何其可悲的生活,所知所接觸的都是受過濾下才接收,但再細想,電影中他們大部份時間是幸福快樂而和諧的,我不曾在外國生活,但知道他們的家庭生活不太長久,年紀輕輕便出來各自組織家庭,父母也不常見,這片的和諧家庭生活在外國人來看衝擊當然會比我們大

當中最令我大感受的是很多觀眾發笑的一場,父母的周年記念,父親用英文歌曲配上自己想像的旁白去傳授家庭的愛,很怪,看著觀眾很開心的笑我內心很難受,再接下來是兩個女兒的舞蹈場面,很滑稽很小朋友的舞步,觀眾笑得更開心,但看著大人跳著這舞步,其實滿可悲的,之後小女兒倦了留下大女兒一人表演,舞步不同了受污染後的大女兒跳出滿誘惑的舞步,是蠻適合她的年齡,但想想這是否真的適合呢?不盡然

電影有一幕講述父親的一頭狗在被訓練中,教練談及狗是可以做朋友,家人或稱呼你為master,父親此時在沈思,其實很明顯地導演是想用此比較明白的說出父親所用的手法就是教狗的模式,但子女當然亦有不同性格,所以做就出最後自斷犬齒逃出圍牆的女兒,至於是牆內的幸福還是因受過外來刺激污染勇敢跳出框框的比較幸福,影片一黑的ending,留給觀眾自行判斷

另,影片的拍攝角度有趣,很多時是斬頭斬腳或是東西有一半而沒有另一半,導演這表達是想說明觀眾對他一家的探視角度還是借喻我們只"看見"事件的一部份呢?電影其實沒有想像中的深奧但還是充滿引導性話題性,這正是本片的高明之處

<29/03/10:夜>
Photo Link

29 March 2010

I'm in trouble

~~나는 곤경에 처했다!(I'm in Trouble,我的大獲人生) - [2009]~~

今年又在電影節看到韓國電影,上年的一千零一杯是孤單而無奈的旅程,但今次的是一個都市的童話故事,無獨有偶又是一個關於酒的故事,為何說是童話故事很簡單,因為一個無所事事永遠自稱詩人的無業男子,雖然生活在睡覺及酒精當中,但身邊總有人照顧及關心,真的很難相信每次喝酒過後攪得一塌胡塗的人每次諾言過後重滔覆切的人可以被不停的原諒,故事ending是主角SeonWoo再次獲得女友Yuna的原諒,但究竟是final結果還是沒完沒了的breakup就不得而知了,觀眾發問為何最後要寫他們再次一起,其實我也不太明白,可能正如女角所答這就是愛吧,如此漂亮溫順的女友一次又一次的接受沒完沒了的男角,作為觀眾實在有點難以接受,其實這片我覺沒什麼意思或訊息存在,只是單純的都市故事及如夢的情詩一則吧,我實在不太感冒,哈

<28/03/10:日>

28 March 2010

Life During Wartime

~~Life During Wartime(感情線上腦交戰) - [2009]~~

Life During Wartime中文譯作感情線上腦交戰,講述3姐妹如何爭扎求存如何在自己及生活戰火中做回正常人,故事中談及很多很多東西,但主題主要圍繞forgive & forgot,狀似老生常談的課題但其實我們又時常遇見,究竟忘記還是原諒,可以有很多combination,故事中的主人翁也各有不同的睇法及定位,在滿懷傷痛的生活中究竟是自怨自挨,勇敢步出還是在內心爭扎中找緊自己的想法呢,這故事可以引發無限的思考空間,但絮絮不斷可能有人會覺得很悶,在我來說尚可,而且感覺此片有點美國獨立電影的風格,而且還留意到鏡頭中不停出現很多直線和格子,是表達crossroad & crossing it 嗎?

<27/03/10:夜>

27 March 2010

海運戲院 + 尖沙咀碼頭

貳零零捌年捌月叁拾壹號 - 海運戲院 + 尖沙咀碼頭

海運戲院 - 聽講海運會係9月1號結業,無論係真定假,當年始終因為係大戲院既關係,好多戲都曾係依度睇,長長既樓梯及入面既大堂只係裝修過但格局始終如一,襯如常運作時好好影番d相留念一下


尖沙咀碼頭 - 另因尖沙咀碼頭既巴士站亦快遷拆,雖然之前影過下,但都係順手影多幾張相好d

<31/08/08>
Photo Link <<<<<<<<<<

生命無限公司

~~生命無限公司(Life is wonderful) - [2008]~~

很久沒看過台灣片了,這套生命無限公司戲名特別,故事設定也頗有趣,孩子氣的嬤嬤,因子女的選擇,將喬扭的孫女交給她照顧,加上特別的行業,在一個互不相識的情況下共同生活在台南的鄉村,當中的故事應該可以很有趣,但好象捉到鹿不懂脫角,起初嬤孫的不協調及無奈,不懂字的嬤嬤講述自己的生命無限公司,孫女同學的戲弄等等感覺不錯亦很有趣,一間大大的屋子互相不協調的生活,令我想起內地電影"我們倆",但這套電影沒有深切的描寫他們的關係,相處過後沒有火花,故事也象有點停滯不前,太平板,準管後來嬤嬤偉大的付出,但總是沒有力量或投入感啟動當中應有的感動,浪費了原本頗不錯的的材料,有點可惜

<26/03/10:夜>

26 March 2010

Martyrs

~~Martyrs(殉難者) - [2008]~~

相當不錯的法國電影,首先前半段是明快的節奏及故事,透過兒事經歷產生暴力傾向及幻覺,滿畫面充斥血腥血腥幻覺幻覺,使人不期然的跌入導演的圈套或一貫hollywood或通俗式的故事包裝及走向,當觀者自以為聰明洞悉一切時,故事原來會折然不同,手法當然也來一個急轉,由前半的明快轉到後來每節慢慢的一層層深入,故事還可以自圓其說,整套片有著高明及我比較欣賞的另類處理手法,不錯

總括而言,是人性深層的考驗,不單主角受罪我覺得觀者也一起承擔,當中的折磨會看得令人相當不安,道德觀念強或善良人仕不宜觀看

<25/03/10:夜>

25 March 2010

Slice

~~เฉือน(Chuen,Slice,切切切) - [2010]~~

近年一直愛看泰國電影,這套雖然以血為主但尚算不錯,故事由連環血腥兇殺案為主,串插主角Tai及Nut少年時的經歷,雖然開始時看得一頭霧水摸不著頭腦仲很快已知大約的故事,twist位亦不見突出,很容易已看出端倪,但由血腥變至最後的淒美愛情故事實在有點特別

<24/03/10:夜>

24 March 2010

The Hunter

~~Shekarchi(The Hunter,憤怒時刻) - [2010]~~

伊朗電影並非第一次觀看但機會仍相對起其他國家少,其實電影中沒有什麼特別的故事,而且也時常發生在hollywood電影當中,但因拍攝的國家不同,當中的故事,人物處理或景色等等也著實有所不同,近年愛看非hollywood片就是這個原因了,此片令我感覺到伊朗城市的發展比想像中還好,而且電影的拍攝取景及角度很不錯,喜歡導演及男角Rafi Pitts在分享會中提及種種在伊朗的生活及看法,更為深刻的一句是談及國家人民總以為句子結尾是一點的句號,但其實是有三點的省略號,滿有思想的空間,故事也正如導演所說,有很多劇情沒有清楚的去交代,個人也覺得電影用上了3個不同角色的孩子作為對國家的前景象徵或看法,孩子代表未來,他們的"孩子"將會引起憤怒,轉變還是有所救贖呢?我覺得這才是電影中要說的話

Anyway,看此片是當作欣賞及認識比較少接觸的國家也著實不錯

<23/03/10:夜>

23 March 2010

Inglourious Basterds

~~Inglourious Basterds(希魔撞正殺人狂) - [2009]~~

一套相信好看的QT作品,起初正正經經差點沒看出是他的電影,這套戲我覺得比之前的內歛/低調,但看QT就要保持一貫的清醒,冷不防他一個不留神的殺著,

故事鋪排及節奏十分之精彩,當中很多場也可做出緊湊的效果,主角或配角我覺得完全合適而有所發揮,特別是飾演Hans Landa的Christoph Waltz,完全是由頭帶至尾

電影轉來轉去也是大話及偽裝,所有大人物全也死得不明不白反而小角色小人物才可做就大事,換下了衣服轉換了口音,是否就可以瞞天過海呢?感覺QT沒有以往的刻意的玩味反而用比較輕微的玩意去講他想說的故事/想法,所以我說這部片感覺比以往內歛而更為電影,但沒有欠缺他的頑童本色,而且不失為一部好戲,順帶一提,片中的猶太女子很美

<22/03/10:夜>

22 March 2010

The Fourth Kind

~~The Fourth Kind(第四類接觸) - [2009]~~

聲稱真人真事的電影,片中的主角面色極其之差,如不是受其電影中所說的外來因素影響相信精神折磨亦相當之利害才會浮現出如此面相,說回電影,拍攝(或稱之為表述)手法有趣,用錄音帶影帶等等穿插演員及當時所發生的錄像增加觀眾的投入程度,有時還會一幕四格一次過展示電影及錄像的表達手法,姑勿論真假,但我覺得相當可觀,可惜是電影並不是我想看的靈異現象而是到尾部偏向的外星人事件,加上Milla Jovovich,某幾個全白shot令我想起Resident Evil,anyway,如全身投入相信故事中的真實及拿此片作為documentary來看的話,此片也相當的有驚嚇力量

<21/03/10:夜>

21 March 2010

西貢怡庭營地

貳零零捌年捌月貳至叁號 - 西貢怡庭營地

第二次到怡庭營地,天氣冇上次咁熱,天色亦清澈明朗,magic hour加上靚雲,不錯

bbq後整左個小小實驗,二氧化炭捕蚊器,可惜失敗收場,哈哈

<02&03/08/08>
Photo Link <<<<<<<<<

20 March 2010

機場日落

貳零零捌年柒月貳拾肆號 - 機場日落

聽人講過好多次機場日落相當漂亮,但雖然係機場番左工咁多年,始終都一次冇去過,卒之係7月夏天既時候去左機場維修站影左一次日落lu

機場維修站落車行左差唔多2個幾字,先到達中段既影日落地方,雖然行到死死下,但沿途景色都真係唔錯

<24/07/08>
Photo Link <<<<<<<<<<<<<<

19 March 2010

廣州2008

貳零零捌年柒月伍至陸號 - 廣州

去廣州飲飲食食,係上下九既如家快捷酒店住左一晚,價錢平房既設備一定只係去到基本要求,但乾乾淨淨在我黎講已經合格有餘

因塞車既關係,到廣州時已差不多黃昏,酒店check in後就去同一條街既老牌酒家陶陶居食飯,講真晚飯真係一般,反而之前去過飲茶就相對黎講好得多,平而好食,亦可以食番好多細個時既點心,香港反而食唔番,而小菜真係一般,even講到好強既冠軍鴨亦不過不失,唔覺特別

食過飯後行左陣食街,所賣既野都唔太合口味,行過後好快就番酒店,但唯一特別既係酒店樓下賣小食既小販好似好熱鬧咁,還可啦

第二日一早去白天鵝飲茶,環境食物不錯但價錢相對黎講亦當然比較貴啦,之後去左附近既沙面行下,果度既建築物古舊而歐化,但可能發展左一段時間同埋落雨既關係,觀賞興趣只係一般而已

之後去左聚賢堂,地方好大,印象最深既係放神主牌既地方,雖然已經空空如也,但想像到當年放滿神主牌一定好壯觀

最後行多左陣街去過真功夫食飯後就番香港lu,冇咩點食過咩好野同係咁倚行下名勝就算,好明顯我地準備功夫係冇既.哈哈

<05&06/07/08>
Photo Link <<<<<<<<<<<<<<

18 March 2010

歐遊(倫敦,巴黎,巴塞隆拿) 2008-04-30to12 - Part.15(after euro trip)

貳零零捌年肆月貳拾至伍月拾貳號 - 歐遊(倫敦,巴黎,巴塞隆拿)

經過十數日既旅行,唔多唔少都有dd既旅行感覺想講,但因mp3機既關係,當時所錄既野全部都聽唔番,就靠記憶講講啦

地鐵
倫敦既地鐵好嘈,而車亦有新有舊上班下班時間好多好多人,而因為小報大行其道免費派發既關係,加上佢地慣性睇完就放低比下一手人睇既關係攪到一車都係報紙,都其實幾亂糟糟,但夠環保啦算係,哈,另唔明點解佢地d車卡咁窄,坐低後對腳就已經佔左走廊既一部份,變得行過時人撞腳腳撞人,雖然佢地唔似得美國人咁高大,但d腳都唔短丫,攪到咁窄真係辛苦
法國既地鐵好舊但亦最有特色,可能因為去廁所要錢既關係,所以好多地方都好臭,儀就好怕但我就三地中最愛法國既地鐵,中意佢舊而帶有靈魂,大大張海報加上快速而過既途人,感覺不錯,但聽講法國已開始番新地鐵,有某d站亦重新裝修,新而光猛但感覺一式一樣失去靈魂,我不太喜歡,丫仲有,法國既地鐵combine左兩間公司既路線,加上地鐵站四通八達,其實都幾亂幾覆習,但研究清楚後其實都好簡單,另法國既metro站與站之間非常短,我地成日一過不留神搭過龍,哈哈
西班牙既地鐵比起前兩者新得多,同香港地鐵差不多感覺,so far so good但勝在平

人既感覺

其實幾個地方既人比起想像中矮,都冇咩見到好高既人,而倫敦就係幾個地方比較矮既,好多人都仲矮過我,我以為中國人應該唔夠歐洲人高,但事實又唔係咁樣,當然歐洲人既衣著係比較有型,以office裝束既比較突出,加上發覺佢地全部都唔中意擔遮,就咁比d雨?,可能咁先型啦,哈哈另可能係因為我地以搭metro為主,感覺到法國好多黑人,其實可能有錢既法國人係手查車所以先有咁既感覺,don't know.不過我地係香榭麗謝大道見到有個乞衣都係著fur既,好型哈哈,而西班牙人就好多都穿晒環,個人感覺好似好痛同埋不太順眼不過可能佢地覺得好睇啦 =P

地方既感覺

英法既地方比較有錢,而西班牙既建築比較有特色,各有各好,但西班牙治安始終感覺總比其餘兩國差,之但係如果有得再去倫敦,巴黎同埋巴塞,我會唔要巴黎而揀巴塞,可能我覺得巴黎實在太遊客感(名勝名勝名勝,當中又太近太方便太近,果種砌出黎既造就感我不太受落)加上我唔中意買野既關係,所以覺得佢雖然靚但唔值得再去而巴塞可仲未睇夠同埋感覺上冇咁遊客而自然得多,anyway,個人感覺而已

Back to Part.01

<30to12/04/08>
Photo Link <<<<<<<<<<<<<<<

17 March 2010

歐遊(倫敦,巴黎,巴塞隆拿) 2008-04-30to12 - Part.14(12May)

貳零零捌年肆月貳拾至伍月拾貳號 - 歐遊(倫敦,巴黎,巴塞隆拿)

12 may 2008 Mon LON Sunny day
一大早起身執好野羅埋d舊衫去掉就番去阿姨屋企,因為順手既關係就幫阿姨羅埋d床單番去等佢可以洗完後就有得再用,依個順手真係不錯,因為時間既關係我地實在要即走,阿姨比左大包早餐我地再送埋我地出門口講過再見後我地就走lu,真係感激阿姨的招待,好warm好好人,我地羅住熱辣辣既大包搭完metro再搵左一段路後去到搭火車過機場,機場好多人亦幾舊下但尚算乾淨而有秩序,等左一陣就上飛機lu,係機上當然又羅番個晴天公仔出黎掛係飛機既窗口,話晒都想有個晴天既倫敦啦

去到倫敦果然好天,wow,我去過幾次倫敦都好似未見過藍天,cool.晴天公仔果然強

係T5度搵到個行李寄存差唔多要成8磅,真係好貴,但又冇理由咩住d野四維走丫,都係比啦最後

第一站係白金漢宮(Buckingham Palace),我地諗住就岩時間睇換班但去個好似又岩岩過左,都唔知個schedule其實係點,anyway,係閘口影左幾張相後就開始過番去Westminster度行埋第一日未行既既last幾個景點,搭underground去到TLondon Brigde站行番去London Brigde原來好近,但唔知點解當日我地又覺行極都唔到呢? 好神奇
藍天下既倫敦,又係相當之靚既,其實地大加上宏偉建設加上大大個藍天又點會唔靚丫

經過一連串既行程,番到去機場咁岩就係日落,影過機場日落相後就此結束一個歐洲之旅lu,奇實真係唔多夠皮,有機會再去啦

Part.15(13May-BCN)

<30to12/04/08>
Photo Link <<<<<<<<<<<<


16 March 2010

歐遊(倫敦,巴黎,巴塞隆拿) 2008-04-30to12 - Part.13(11May)

貳零零捌年肆月貳拾至伍月拾貳號 - 歐遊(倫敦,巴黎,巴塞隆拿)

11 may 2008 Sun BCN Sunny day
可能因為所住既房不見天日既關係,我地亦好似平常差不多時間先起身,伸隻耳仔出窗口,聽唔見雨聲,心諗個晴天公仔唔通真係work,衝出房口去到同屋既房望望,打開個窗果然見到晴天,心情即時大好,儀即時話要再去多一次奎爾公園,我就話點都要去陽光海灘灘番下先得,我地好快咁換過衫出門口去阿姨食完早餐就走人,阿姨仲講其他人一早見到好天就起哄然後好快咁出晒門口lu,我地好似有d遲左少少,哈

第一站當然係奎爾公園,陽光下既奎爾公園果然好多人,好難先迫到一個好地方影下相,廣場係晴天同雨天下既分別果然好大,雨天冷冷清清,地下一片泥濘,好天既就人頭湧湧,坐無虛席,係陽光下卒之睇清楚佢地用磁磚碎片所砌出黎既"登"真係幾靚,同蜥蜴影左幾張藍天既相後冇幾耐就離開lu,因為好多地方其實都睇過晒o剌 =P

第二站係去哥倫布紀念塔(Monumrntot a Colon),途中撞到個民宿既宿友,聽講佢坐遊覽車周圍去但我地覺得好似好浪費時間咁所以好多地方都係metro攪掂,之後我地開始去搵野食,因為係last day,所以會去食下西班牙抄飯(其實我唔係太"好",不過儀好想去,是但啦),印象中國王廣場附近應該有好多價錢還可既餐廳,但唔知係咪sunday既關係,好多都close左,經過左幾日行過既大街小巷後,都係搵唔到既心水既餐廳,所以我地決定左去番海灘附近既地方搵下有冇得食,印象中係有幾間價錢ok的行行下見到有間係馬路旁既餐廳,價錢亦相當ok,所以就搵左個open area坐低食個lunch,儀當然係西班牙抄飯,但我要個set lunch己可以,21.5歐兩個人仲包野飲,食物亦不錯,算係咁lu
之後行去海灘,但用不同既路行過去,中途經過當地居民所住既地方,感覺又不一樣,但因之前既手槍事件,我地都係抱住看一看不深入既宗旨而行,哈哈,其實我地係去國王廣場搭metro既途中,有個當地人專登同我地講咩背囊要小心,原因係佢話門口果幾個係扒手,我地表示明白後就睇睇佢所講既扒手究竟係有咩特別,見佢地遊客既打扮有一個年紀大少少既女人帶住3-4個十零歲既後生女,感覺上好似遊客帶住幾個仔女出去旅行咁,又幾容易令人減少防範既,後尾去到一個好多人表演既廣場,因我不太好果種郁都唔郁扮假人既街頭表演,所以我轉而留意下身邊所有既人,好快就到一個頭帶太陽眼鏡打扮好遊客feel既女人係度係咁目及住阿儀既背囊都唔係睇野既,睇多兩睇就知佢心懷不鬼,所以就企左儀後面扮睇野,佢可能知我知所以就好快走開左lu,經過手槍及扒手事件,西班牙果然係比英法兩國雜一d
係海灘灘左陣後,就開始周圍睇睇,去到一度有好多石頭既地方,細心睇睇原來有好多人刻左好多公仔係d石度,可以當佢係另類既塗鴉

之後再用gps去搵海灘盡頭既特色長椅,圖片我未見過但儀話好有趣,所以順手去睇睇,但行左好大既一段路去到果個point但只見一片草地,感覺應該拆左所以搵多左陣就走左lu
番到阿姨屋企食過飯後宿友話要出去睇噴水池表演,我地見咁多人又係last day,所以一齊出左去,原來表演場地係MNAC下面既廣場,當日電單車展覽封住左,所以我地當日並冇行過,噴水池附近好多人,個個都好似想搵個有利地點睇下影下相,好快咁就同宿友失散左,我見好多人走左上個小山丘度睇,所以我都唔放過,爬左上去果然睇得清楚好多,表演好快就開始左,五光十色有d人就走左上去噴水池旁邊跳舞,好開心咁,我覺得都幾靚但儀話一般,我地睇野果然係非常非常不一致甚至乎係去到南北兩極既景界,係行番去搭metro既途中講起,話雖然係南轅北轍但合則來不合則分既旅行方式都幾有趣,我仲講起儀既認路之強係我好想搵佢一齊自由行既原因,因為佢係一個人肉gps,我就一d都唔認得路,如果冇gps我估我有排都搵唔到目的地,哈哈
見時間尚早所以去多次聖家堂,夜晚既聖家堂又係另一種感覺,但人越黎越少我地都不宜久留,所以就開始番歸,係回家既途中,當然係最後一次去一去我地日日都幫襯既check point啦,去到岩岩關緊門,但老闆見到係"熟客"所以叫佢仔仔開番門比我地,我地幫襯埋最後一次後就係門口影左幾張相,見佢仔仔好好奇咁望住我地.哈

係行番去既途中,見條街比平時食飯後更靜,所以我地出左出馬路行,感覺上安全一點,因為果度真係鬼影都冇隻,快快手番到屋沖過涼後就開始執野,因為我其實冇咩野既關係所以好匆執完就無無聊聊睇下依個trip既數,原來真係用左好少錢 =)

因第日要搭11點機,所以攪掂埋d野就訓lu

Part.14(12May-BCN)

<30to12/04/08>
Photo Link <<<<<<<<<<<<

15 March 2010

歐遊(倫敦,巴黎,巴塞隆拿) 2008-04-30to12 - Part.12(10May)

貳零零捌年肆月貳拾至伍月拾貳號 - 歐遊(倫敦,巴黎,巴塞隆拿)

10 may 2008 Sat BCN Rainy day
因為已經係尾2兩日係巴塞,我地卒之都決定左去奎爾公園(Parc Guell)睇睇, 雨冇收細到,仍然係一時時既雨粉粉或大風大雨,所以我地可以影到冇人係旁邊既蜥蜴,冇咩人既樓梯入口,冇咩人既空地同埋用瓷磚的碎片砌出黎彎彎曲曲既長椅,仲有幾個山洞感覺既地方,全部都係拼拼砌砌,但雨真係好大,我地用左好多時間去避雨同埋餵白鴒,哈哈
之後我地行行下去左高弟所住既地方Casa Museu Gaudi,四歐入一入一間屋如果唔係落大雨我估我地都唔一定入去,入面真係唔算太大,大廳睡房廁所等等,我覺得最有特色係地下既地磚,每一間房基本上都有不同既地磚,配合上上面既傢私看似隨意但實質相當配合,粉紅色既外牆相當和諧及童話既感覺,周邊亦有大大小小的藝術作品,充滿藝術包圍既感覺

最後去左買記念品既地方,原來係大雨下望回奎爾公園既樓梯,人流疏落,別有一番感覺

因為出發時間遲同埋太多避雨時間,所以基本上全日只係去左一個地方,係打道回府既途中,經過一間比較舊而地道街坊既酒吧,行過時已經聽到入面好嘈,但因西班牙人講野本身都好快同嘈吵,所以不大留意,點知過左無幾耐就見有兩個手查槍既o靚仔衝出門口,但又唔走遠反而係lee埋酒吧門口既牆邊係度等,我地同佢既距離應該冇十呎,所以好清楚咁睇到佢地手上既槍同埋笑笑口係度等,而裡面既人就係係一直鬧,我地都唔知發生咩事所以繼續行,但儀就係果時問我咩事係咪真架?我就答佢鬼知咩,跟手儀就講好驚好快d走,所以我地就加快步速,但又唔係跑既速度因為怕打草驚蛇比人"啡",其實果十零步至轉角後既一段路程唔多唔少都有少少驚,不過過後又唔覺一回咩事,反而後尾先知道原來儀同佢地有眼神接觸,所以知不知話好驚,哈哈

番到所住既屋,槍手事件已告一段落我地所關心既反而係西班牙既天氣仲會唔會落雨,因為第日已經係last一day留係西班牙,我地唔想係西班牙全雨天度過,所以依個好重要,沖涼過後快快手整番個晴天公仔,希望用最傳統既方式call番個藍天番黎,哈哈

後尾番主屋度食飯,卒之見到從香港黎既女仔,佢既partner因地方過於簡陋而所去既方法及地方有著太多分歧,打從黎到巴塞既第一日已分道揚鑣,聽佢講自己一條友搭車出左去城外既蒙錫那(Montserrat)遊覽,天氣凍得可以加上時間唔多配合既關係,一出一入番到黎已經十一點幾,一個人自己搭車同埋番屋加上盪失路,半夜三更自己一個女仔係依個冇咩人既民區行同搵路,都唔講話唔危險,佢真係幾大膽而有韌力,但感覺上好似好趕好辛苦咁,可能我係佢partner都頂唔順,哈哈

另外聽張阿姨講有幾個從香港黎既小朋友到左,佢地係法國讀書自己用幾日時間游游西班牙,張阿姨口中既小朋友(應該都有17-8歲)我地見唔到但只見到佢地一地既行李,原來係因為佢地買既火車票日子配合唔到,除要加錢外亦要停留多係巴塞2日,張阿姨話佢地因為係小朋友樣所以比人搵笨要加錢又見佢地可憐見地方full晒都留佢地訓自己間房同地下,怪不知一地行李啦

感覺上西班牙既英文水平比法國差,所以溝通有時都係一個問題

到左尾二既一晚,民宿既感覺除左好食及尚可的住宿外,人來人往既同屋及同木台既食飯人幾有趣,有時同木台食飯既只係食過一次飯或只係見過一面,今日新黎既舊既第日又唔見左,之前已講過當中好多既係居於歐洲既台灣人或中國人,但原來亦有幾個來自中國但旅行左一段好長既時間,有個男人同老婆及媽去左成年旅行,美國亞洲東歐西歐北歐全部去過,另有一個女人亦係一樣,差不多全部去晒,只係佢係自己一個同埋個樣比起果個男人更平民化,我覺得佢似一個普通而成日困係屋企默默耕耘既師拉一樣,真係睇唔出佢自己一個人可以去左咁左地方,其實住民宿加上親切既主持感覺上真係幾特別

Part.13(11May-BCN)

<30to12/04/08>
Photo Link <<<<<<<<<<<<<

14 March 2010

Gorillaz -The Plastic Beach

很久沒有聽過Gorillaz了,雖然不是每張也捧場,但始終是Damon一手創辦的virtual band,有新碟也找來聽聽罷,但3月推出的大碟The Plastic Beach,聽得我有種想找人打一身的感覺,第一次聽到中段已經煩躁不安,完全欠缺耐性,到尾段還大聲的damn it出來,心想Gorillaz在攪什麼東東

冷靜下來鼓起勇氣及強注EQ後再聽一次,發覺好多了,但我仍不知有否信心再聽他的第三round,知道碟內編曲意念及演繹真的很不一樣,但我真的是嗌了救命,找找文,有人說這碟適合意識模糊或睡前聽聽,會有不同的感覺,但我估計我一定會暴躁得跳起,老實說這碟聽得我很躁底,之前從未有過,哈

這下面是我聽第2 round後記下的感覺,純個人感受,不同意算罷

track 1 Orchestral Intro 我總覺得這個intro總在滲入令人煩躁的節奏
track 2 Welcome To the World of the Plastic Beach 經過track 1令人煩躁的節奏,這個又帶回Gorillaz的影子
track 3 White Flag 以為已經和煩躁走遠,但它強烈的中國風,在處理手法上又令我有想死的感覺
track 4 Rhinestone Eyes 令人覺得有點點小島風情
track 5 Stylo帶有比較強烈的黑人風,但仍不是我杯茶
track 6 Superfast Jellyfish少了煩燥感,但pop味十足,可能始終不太好電音
track 7 Empire Ants 開始進入佳景,起碼節奏是我喜歡的
track 8 Glitter Freeze 呢喃呢喃呢喃,雖然看似優美的曲風,但我........
track 9 Some Kind Of nature 對,是電影,一定有關係,但之後又是什麼呀?
track 10 On Melancholy Hill 有點時光倒流到80年代
track 11 Broken 圍繞的聲音,我又有點煩躁了
track 12 Sweepstakes 前面一小節很輕鬆,但之後就明顯的拖慢,拉呀拉,完全落在正常節奏後,很懶懶閒閒的步伐,有趣
track 13 Plastic Beach 吵呀吵,很吵呀
track 14 To Binge 節奏輕盈也很易聽但個人感覺很pop,但中段開始很吵,沒法聽完整整的12分53秒的歌曲,聽了2round也不能 -_-
track 15 Clould of Unknowing 可能他們覺得折磨得我實在太緊要,卒之在差不多結尾時來了首比較raw而少動作的曲調,多謝了
track 16 Pirate Jet 飛起來乙水乙水轉的background,加上Damon沙啞的演繹,不錯

話雖這碟會聽得我躁底,但希望第3次聽後會帶來不一樣的評價/感覺

Try this Song : Stylo <不為什麼,只因這歌有mv在youtube>
Official Website : http://gorillaz.com/
<14/03/10:夜>

Massive Attack - Heligoland

Trip-Hop老大哥Massive Attack卒之在10年2月推出了新大碟Heligoland,和對上一張100th window相隔了足足7年,老實說剛剛知道new album release時心情真是說不出的興奮,第一次聽也沒有令我失望,而且越聽越好聽,這張Heligoland是我近來不停重覆的playlist

說說內裡的歌曲,雖然依舊引入很多猛人參與,但我最喜歡還是3D的vocal,而track9的Saturday Come Slow,可能Damon Albarn本身的聲線實在太有個人風格,總覺得和Massive Attack格格不入,其他的歌曲我也沒有什麼異議了,一般都很有他們的感覺,但相比起之前的最最精彩的Mezzanine,總是沒有超越過,沒辦法,對Massive Attack的要求就是那麼的不一般,但我還很高興他們在10年推出了Heligoland這張專輯

<14/03/10:夜>

歐遊(倫敦,巴黎,巴塞隆拿) 2008-04-30to12 - Part.11(09May)

貳零零捌年肆月貳拾至伍月拾貳號 - 歐遊(倫敦,巴黎,巴塞隆拿)

09 may 2008 Fri BCN Rainy day
一大早起身已見到下雨天,雨勢仲要相當不小,所以原定到奎爾公園既行程改左去MNAC,奎爾宮,西班牙村及聖荷西市場

食過早餐後用T10搭metro到達加泰隆尼美術館(Museu Nacional d'Art de Catalunya),可惜因為有大型電單車展覽,令原本可以直行到目的地既我地要跟隨人潮兜大圈先去到,搭左兩至三段電梯上到去山頂既MNAC,門口有一大堆露天茶座高高在上遠望相當潦闊既景色,可惜天氣關係人流疏落景色亦灰灰朦朦,入到美術館內,又見一大群小朋友參觀,原來除法國外,外國小朋友亦時常出外睇睇依類建築美術館等等增加知識,真幸福

美術館既價錢因為感覺較貴,加上事前亦冇研究過入面既展品,所以我地只係係地下行行走走,感覺上入面既設計簡單而有趣,樓梯走廊既擺放及剪裁(唔知點形容,但我只諗到依個字)很有感覺,不錯

之後到西班牙村(Poble Espanyol de Montjuic),但地點又係指示不清晰,用gps知道係邊但搵左好耐先搵到個入口,大雨大風估估下咁行上條斜路,卒之搵到入口,用巴士coupon平上一歐買飛入內,人不算太多雨亦冇減弱既跡象,求其搵個亭坐低食過午餐餵下一齊避雨既白鴒後就開始出發,可能係專登起出黎比遊客行,我感覺一般,加上又大雨又凍,我地係入面搵左一間叫Fran Daurel既展覽館睇睇,入面唔洗錢但亦唔可以影相,我地以為細細間但原來都有成3層,內裡既展品有d都幾有趣,值得欣賞一下,之後我地出番去周圍行下,行行下就會連我依個唔多中意買野既人都會入d商鋪睇睇,原因唔係d野好靚而係真係好大雨,哈哈.途中經過一間餐廳,門口介紹係可以一路食野一路跳西班牙舞既地方,我估入面都幾有特色,但感覺幾high,我地依個經濟團梗係冇入去幫襯啦
之後去左奎爾宮(Palau Guell),但之前睇既資料出錯,原來開放時間已經改左,我地冇得入去只好係門口睇下就算,由門口裝入去,內裡似中國或日本既感覺,但唔知實際係點
最後我地去左聖荷西市場(La Boqueria),感覺上同法國既Pere Lachaise Market一樣咁中意,可能係入面充滿色彩既生果同埋檔口比起法國更為豐富,生果排得整整齊齊五花百門五光十色,入面鋪頭既人亦對鏡頭習以為常,所以係我係裡面影左好多好多相 =P
依日因天雨關係,我地未天黑已經打道回府,番去既途中仲係我地晚晚都去既SPAR express度買左一定數量既野食打發下時間,哈哈

順帶一提,係supermarket買果包磨菇忌廉湯真係鹹死人,我估一包要黎煮一煲湯就差唔多

Part.12(10May-BCN)

<30to12/04/08>
Photo Link <<<<<<<<<<<<<


13 March 2010

歐遊(倫敦,巴黎,巴塞隆拿) 2008-04-30to12 - Part.10(08May)

貳零零捌年肆月貳拾至伍月拾貳號 - 歐遊(倫敦,巴黎,巴塞隆拿)

08 may 2008 Thu BCN Cloudy day
一早食過張阿姨的巨型大包加清淡早餐後,就去左聖十字及聖和平醫院(Hospital de la Santa Cteu I Sant Pau),裡面充滿藝術色彩,有部份我覺得好靚但另有一d建築好似風格不一,我較為有保留,後尾查番原來係由父子(多梅內切和佩雷)兩人的所建造,怪不知風格好似不太統一,入面既醫生看似遊閒,食住煙行步路亦似遊客散步一樣,想起西班牙有成2-3個鐘的午飯時間,基本上1-4點好多機構都會關門,歐洲真係幸福
第二個地點係去巴塞非常出名既聖家堂(Sagrada Familia),我成日覺依座建築物好似幾支燒溶左既蠟燭,實際上遠遠望到真身都仍然覺得幾似,聖家堂有分新舊兩面,舊既雕塑已經睇得唔太清楚而新既就相當漂亮,根據資料顯示係聖經故事,我雖然唔太認識但以藝術角度黎睇,都幾講心思及萬二分認真,怪不知地位超然,我地用左7歐入場加2歐上塔,基本上地下要睇既野不太特別,工地居多,但上樓依2歐就相當超值,風景內裡窄窄及轉個不停既樓梯亦令人大開眼界,但因為實在太窄,怪不知唔可停留影相啦,聖家堂入面仲有一個展覽館,睇番咁多年來佢既轉變都幾有趣,食過午餐後就見天色陰暗,感覺有少少不安,心諗唔知會唔會落雨呢
第三站去左米拉之家(Casa Mila),充滿曲線及泥土感的外表,網狀的大門抽離及不太實在感的內部及天台,用左阿姨比既巴士coupon,special price用上7.2歐遊一遊這座充滿特色既建築物還可啦,聽講雨天天台就會close,好彩我地去果時只係天陰,但相信藍天下既高弟作品會更為有個性
第四站來到巴由之家(Casa Batllo),因價錢不太便宜既關係,我地只係係外圍一看,巴由之家既感覺充滿故事感,窗及露台好似一個個籠及戴上面具既枯髏骨,聽講入面既門,lift及窗既design都好前衛及有趣,但成11-2歐,所以當時我地放棄左


最後我地到左大牛場(Placa de Toros Monumental),可惜係當日並冇賽事而5歐入內睇冇人冇牛既鬥牛場,經過討論後,亦放棄了,只係係邊皮及外圍影下售票處就算,感覺上如果撞正鬥牛日一定會相當熱鬧

番到阿姨屋企有得食西班牙海鮮抄飯,但可能太林及多水既關係我覺得一般

<30to12/04/08>
Photo Link <<<<<<<<<<<<<

12 March 2010

歐遊(倫敦,巴黎,巴塞隆拿) 2008-04-30to12 - Part.09(07May)

貳零零捌年肆月貳拾至伍月拾貳號 - 歐遊(倫敦,巴黎,巴塞隆拿)

07 may 2008 Wed BCN Sunny day

一大早已經到左巴塞火車站,感覺上比法國火車站新淨得多,一到步最開心係見到廁所卒之唔洗錢,哈哈,去過火車站廁所同埋食完係法國帶過黎既麵包早餐後,就開著個gps搵搵metro站既位置,因為火車站入面同埋路面既指示不太清晰既關係,我地都搵左一陣先搵到,metro對比起法國甚至乎倫敦亦係新淨得多,感覺上乾淨先進有d似香港既地鐵站,搭左半個鐘左右既車程到左poblenou,因為果度屬於係民居,路牌更少路亦更難搵,兜兜轉轉用上差唔多一個鐘既時間,卒之搵到我地係西班牙既落腳地,張阿姨旅店,到步時見裡面既人不太多,只有3數個在吃早飯(定午飯呢?)anyway,我地一入去張阿姨就問我地食左野未,我地回答過後就放低行李,後來知道我地係住另外一度,所以我地交低錢再等左一陣後張阿姨就羅住架單車帶我地去所住既地方,果時我心諗要羅單車一定唔係咁近,一路行時張阿姨就問我地係咪好難搵,我就好老實地答真係有d難度,途中經過見到一個女人,張阿姨同我地講個女人精神有d問題,之前佢黎依度住仲好正常但幾年後已變得不太正常,一口可惜既感覺,果時覺得張阿姨份人真係幾親切,行左3-5條街後先到我地既目的地,果度好似工廠區既感覺,街上人同車都唔太多,感覺上幾靜,有少少擔心夜晚依度會靜成點,哈哈

入到大廈入面,只有一條樓梯及一部好古老既lift,部lift仲係可以望得通既設計,細個果時係香港區搭過之後一直都冇咩見過,張阿姨叫我同儀搭lift上一樓,佢自己行樓梯,心中既疑問又再一次出左黎,入到lift後原來好細,成部lift只可以裝2個人,max for 2person,哈哈,原來如此

雖然lift同埋走廊真係幾古舊,但屋入面感覺不錯,我地仲有一間房住,後尾知道原來我地一早訂,所以先有間四正既房住下,又係既,25歐又早晚餐又住又個似樣少少既沖涼房,都真係好抵lu,所以對依個民宿整體上十分滿意,特別係張阿姨所煮既野食十分好味,係歐洲食左咁多日麵同麵包後,雖然我對食冇咩要求但感覺上仍然係高興既


張阿姨講低左suggest既路程同埋要注意既事項後就趕番主屋打點一切,睇黎佢真係好忙,我地放低左行李,passport同埋羅左一d要用既錢加上鎖上門後就出發(雖然度房門個鎖爛爛地,哈哈),首先去左巴塞既市中心哥德區,到過大教堂(Catedral de Barcelona)國王廣場(Placa Del Rei)海上聖母教堂(lglesia de Santa Maria del Mar),途中亦經過畢加索美術館(Museu Picasso)同埋行過左都唔覺既聖海梅廣場(Placa de sant jaume)等等,人多巷多建築物亦多,穿過大街小巷望上藍天及宏偉而古舊既建築物感覺不錯,行左差唔多3-4個鐘後真係要搵搵野食,但可能係遊客區價錢認真不平,求奇去左間連鎖式既快餐店叫左件三文治餐同埋一客薯片兩個人已成10歐,真係一d都唔平,件治仲,哈哈哈

飽肚後係市中心行左一陣就轉左去位於Carrer Ample既Papabubble糖果店,途中又係窄巷,見到一架救傷車窄巷掉頭,攪到我地無路可退入埋人地既鋪頭入面避車,真攪笑,Papabubble鋪仔細細但d糖唔錯,唔太甜幾好食,貨架上五花百門既糖,整整齊齊價錢亦ok,但感覺個package好重,加上我唔太好買野,所以轉左去睇旁邊既整糖示範,個感覺有d似搓麵粉,睇左陣就行左出鋪頭影下相研究下佢地既咭片(幾靚架都)等儀買完野就走左lu


之後一直行呀行去左Barceloneta,張阿姨話個沙灘係屬於地中海,儀相當高興我就覺得地唔地中海咪又係咁,不過個海灘真係好長好長,加埋d遊人同埋個藍天,仲有個唔知咩既藝術建築,整個構圖又真係幾靚既,我地坐低一陣都幾大風海面亦有d凍,見到d遊人多數係行下沙灘曬下太陽玩下波咁但仍有人落海游水,諗起就凍

係沙灘行番所住既地方原來係好近,我地就plan之後有時間可以再黎,話晒真係未hea夠,哈哈

番屋仲過涼就去張阿姨度食晚飯,去到時己見成木台人食緊飯感覺熱鬧,我地入廚房裝過飯後就坐低左,當中有一味紅燒扣肉,好好味,言談間原來住客多數係台灣及內地人,但佢地多數係係歐洲打工或讀書,因地點近既關係到西班牙旅遊,並唔似得我地本身來自香港的旅行,聽張阿姨講當日亦有兩個來自香港既女仔到步,但人來人往既關係未有機會撞到,食過飯後就搵supermarket想買少少野飲,但第一間比較大型既搵唔到我地所需,反而另一間細得多既小型supermarket"SPAR express"我地就搵到自己所需,價錢亦相當平,真高興

<30to12/04/08>
Photo Link <<<<<<<<<<<

11 March 2010

歐遊(倫敦,巴黎,巴塞隆拿) 2008-04-30to12 - Part.08(06May)

貳零零捌年肆月貳拾至伍月拾貳號 - 歐遊(倫敦,巴黎,巴塞隆拿)

06 may 2008 Tue Paris Sunny day

Last一日我地退房後要去Pere Lachaise Cemetery,但因佢附近有個市場(Pere Lachaise Market)岩岩係果日會開,所以順便去埋,依個市場又大又熱鬧,好多生果好多野睇,我極度中意,d麵包仲好平好大個,我地買左少少後行左一排,之後想去飲下咖啡,coffee shop坐左陣飲下coffee,旁邊既人好熱情咁話要幫我地影相,但其實我地拒絕左幾次講唔洗真係有d唔好意思,當中想去下廁所點知佢要收錢,算

坐左陣露天coffee shop後就要走lu,因為仲有墳場同埋牛棚未去,係行去搭metro途中,見到旁邊既商鋪有燒雞賣,就買左2隻要黎做午餐晚餐,雖然要12歐2隻貴左少少(前幾日撞度同事佢話10歐2隻),但都算好平好平,cut開佢後pack好放埋入bag就去搭metro,但當我想入閘時竟然發現唔見左張飛,shit,平時唔見d cheap野就好啦,今日因要去墳場市場牛棚,又要番酒店羅行李之後再去火車站,我買左張全日票先黎唔見,仲要搭左一程就冇左,唉,因為我地冇晒t-ticket,單張又唔抵,要無lala比多10歐去埋其餘地方,好慘 T_T

收拾左傷痛既心情後好快去到Pere Lachaise Cemetery,果度地方又大又古老,但map要比錢所以我地決定左亂咁行就算,入面既墳墓好多都係家族式安葬,基本上都幾大,有d大家族少少既成間屋咁,中途經過有兩間仲大到成個政府大樓咁,勁

時間唔太多,食過午餐後行左陣,中途見到不少烏鴉,有隻仲企左係個墳墓既十字架上,pose同氣氛好夾,所以係咁影佢,話實佢地真係好大隻,個咀又好似好硬咁,我地都唔係太敢行得太埋怕比佢追,哈哈

之後去左牛棚(La Villette),天氣真係好好,紅色既建築物加上藍天及一面綠草地,仲有地標之一既大波波,雖然好晒但感覺一流,仲好想係草地訓番陣,可惜時間真係冇之前咁多,所以有少少遺憾,明明日日都有得係法國周街訓架嘛,唉,行行下見到成班細路係度,佢地著晒一年頭白色既衫係草地玩遊戲,唔知熱唔熱死但一地風車又一大群白色衫小朋友周圍走,雖然天氣好熱但畫面和諧而有趣,法國小朋友真幸福,成日都撞到佢地周圍去,不過成日係咁佢地既父母交通費真係唔少,途中仲見不少遊人踢波蹉單車,草地訓覺睇書晒太陽,真開心,但時間唔早所以我地要番酒店羅行李到火車站結束法國之行lu



去到Paris Austerlitz火車站,可能時間太早(儀同我都未搭過euro overnight train,唔知道原來唔洗過關check in等等,只係等火車到就可以上車,咩都唔洗做 @@),所以又坐低左飲左杯啤酒等睇係邊個月台上車,當中時間太多既關係,睇睇錶我卒之諗起時間岩應該要打番屋企,但老媽冇聽我把聲成個禮拜居然好似冇咩耐性同我講野,係咁易講幾句就好快收線,真係冷酷對冷酷,哈哈

卒之成個鐘後知道月台名,離開酒吧後覺少少肚餓就羅隻雞出黎食,係依個時候我地除左忙碌於食雞外,又開始研究下究竟會咩野人同我地一間房呢?見到一大班punk友係同一月台,我同儀講只要唔好同佢地我就心滿意足lu,食過晚餐雞後,等左陣好快上車lu,火車既走廊真係好窄,我放左個水壺係背囊邊都唔夠位入,真誇張,怪不知有人d行李入唔到房啦,羅0急真大獲

第一次見overnight train既房,原來床未開所以得4張登係度,旁邊有洗手盤有小型衣架等等,雖然窄但算不錯lu,之後有2個外國人入左黎,講講下原來兩個都係法國人,一個自己過巴塞旅行另一個好神秘唔多願講野,態度尚可但明顯英文係好流利只係唔多願講而已

冇幾耐服務小姐入左黎開床同埋收左我地passport去攪手續,原來唔洗自己攪既,嗯

訓火車不嬲好舒服所以我較岩鐘後好快就訓著左,第二朝鬧鐘一響我就好快起身,因為之前係大陸試過賴床攪到鞋都冇著爭d落唔切火車,所以今次我學乖左lu,哈哈

Part.09(07May-BCN)

<30to12/04/08>
Photo Link <<<<<<<<